Калмаш ял гыч Яшкинмытын еш пашашт

Куштылго огыл фермер пашалан чыланат огыл пижын кертыт, кеч тый ялыште шочын-кушкынат гынат. Чынжым каласаш гын, пашажат неле. А Валерий ден Елена Яшкинмыт тидым ыштен кертыныт

Мемнан район территорийыште 80 утла кресаньык-фермер озанлык уло да вияҥеш. Кажне Кфо-ын шке вияҥме историйже. Таче мыланна район газетым лудшо-влакым Калмаш ял гыч Валерий ден Елена Яшкинмыт еш дене палыме ыштыме шуэш.

Апрель тылзе. Киндым ончен-куштышо, мландыште пашам ыштыше еҥ-влак шошо ага палашан ямдылалтыт, а кӧ-дыр пасуш лектын. Мемнан геройна-влакынат пашашт ятыр. Ешыште кажне еҥын илышыже паша дене кылдалтын. Кеч тиде каныш да пайрем кече-влак гынат, мучашдыме паша манаш лиеш.

Ешын озаже Валерий Яковлевич Калмаш ялыште 1963 ий октябрьыште шочын. Изинекак озанлыкыште ачажлан полшен. Сандене лу ияш улмыж годым озанлыкыште учетчик лийын тыршен.

1979 ийыште кандашияш школым тунем пытарымыж деч вара Нефтекамск оласе 15 №-ан СПТУ-ыш пурен. Кумда профилян ялозанлык специалист специальностьым налын. Свердлов лӱмеш озанлыкыште тракторист лийын пашам ышташ тӱҥалын. Вара армийыште служитлен. Демобилизаций деч вара, 1984 ийыште Нефтекамск олаште «Башсельмаш» заводышто пашам ыштен.

Жап эртен, 1985 ийыште Елена Сапиевна дене ешым чоҥеныт. Пырля илат, икшыве-влак – Лиана ден Эвелина ӱдырышт шочыныт. Нефтекамск олаште ныл ий илымеке, самырык еш шочмо ялыш пӧртылеш. Валерий угыч колхоз тракторыш шинчеш. Мемнан геройна машина дене лӱштышӧ оператор, землемер, страховой агент лийын.

Илыш шке черетше дене эрта. Ешыште эше ик икшыве – Артур эргышт шочеш. Неле 2000 ий-влак толын шуыныт. Свердлов лӱмеш озанлык шаланен, Яшкинмыт ялыште кугу огыл кевытым почаш лийыныт. Кызыт кевытыште тӱрлӧ сату ужалалтеш. Ялысе калык райрӱдыш лекде, чылажымат тыште налын кертеш. Варажым посна озанлыкым почаш лийыныт. Тыге 4 ушкалым, 15 шорыкым, 8 сӧснам, 6 презым ашнаш тӱҥалыныт. Яшкинмыт ялсовет гыч 3 гектар кумдык мландым налын да тудым обрабатыватлаш тӱҥалынт.

2011 ийыште нуно кресаньык-фермер озанлыкым ыштат. Калык деч мланде пай-влакым арендыш налыт. А ял калыклан нуно шыжым шудо ден шыдаҥдым пуат.

Ты жаплан ешыште ача ден авалан эҥертышышт – Артур эргышт кушкын шуын. Тудо тыматле да пашам тыршен ыштышан рвезе улеш. Ындыжым тудо еш пашаште тӱҥ полышкалыше.

Тачысе кечылан Яшкинмыт 700 гектар мландышт уло. Тушто пырчан культура-влакым ӱда. Теният ты кумдышто шыдаҥым, шожым, уржам да пурсам ӱдаш палемдат. Тыгак 200 гектарыште шудо кушкеш.

Яшкинмытын машина-трактор паркыштышт кум Белорусь, кок комбайн да моло ялозанлык агрегат уло. Тений нуно ялозанлык техникым уэмдаш шонат. Пашамат ыштымат, тыгак илыш дене тӧр ошкылаш тыршымат. Эртыше ийын Валерий Яшкин Башкортостан Республике делегаций состав дене Российысе 21-ше «Шӧртньӧ шыже» агропромышленный выставкыш миеныт, тудым Россий Федераций ялозанлык министерстве организоватлен лийын. Шуко оҥайым да пайдалым шкаланже пален налын. Тыгак эртыше ийын Валерий Яковлевич «За честь республики» фестиваль-конкурсын республике этапыштыже сеҥен. Пашаштыже сеҥымашке шуымыжлан да тыршен ыштымыжлан Яшкинмыт КФО БР ялозанлык министерствын да администрацийын Чап грамотыжо-влак дене палемдалтын.

Мемнан геройна лӱмеш Калмаш ял клубышто пайрем кас эртен. Тыште ял калык Валерий Яшкиным тудым пашажлан да полшымыжлан ик гана веле огыл тауштен.

Валерий Яковлевич ден Елена Сапиевна шкеж нерген ойлаш огыт йӧрате. Туге гынат ял калык нуным пагала.

– Молодец нуно улыт, – ойлат ялыште. – Кажне ийын шудым, шыдаҥым кондат. Шкеак конден кодат да ястараш полшат. Ялыште пайрем мероприятий-влакым эртараш полышым ончыктат. Пеш сай айдеме нуно улыт.

Тиде куштылго огыл жапыште, кунам пӱтынь элыште коронавирус озалана, тудын ваштареш кучедалаш волонтер-влак ушненыт. Ола ден селалаште шке кумылын еҥ-влак кочкыш продуктым, эмым, коммуналь услугылан тӱлаш илалше еҥ-влаклан полшат. Валерий Яковлевич Артур эргыж дене ты поро паша деч ӧрдыжеш кодын огытыл.

Нуно сурт вольыклан кургым шупшыктат.

Теве тыгай проста да пашам йӧратышан еҥ-влак мемнан районышто илат.

– Еш деч посна мыйын нимо миен ок лек ыле, – мучаште каласыш Валерий Яковлевич. – Мылам ешем ончыко каяш полша. Нуно чыла шотыштат полыш да эҥертыш улыт.