Пашадымылык шотышто пособий кугемын

Туге гынат кажне конкретле случайыште тудын кугытшо посна палемдалтеш

Самоизоляций жап элнан илышышкыже вашталтышым пуртен, паша да пашадар шотышто кугу нелылык лектын. Сандене пашам йомдарыше еҥ-влак могай тӱлам налын кертыт, пособийын кугытшо нерген мыланна Калтаса районышто пашаверым муаш полшышо рӱдер вуйлатыше А.А. Тимиргалиев каласкален.

– Кызыт ме куштылго огыл ситуацийым илен лектына, шуко организаций дистанционный режим дене пашам ышта. Тидын годым мемнан рӱдернат: 28 март гыч 30 апрель марте граждан-влакым ик жаплан огына приниматле. Туге гынат, мемнан пашана чарнен манын каласаш ок лий. 2020 ий 6 апрель гыч Башкортостан Республикын калыклан пашаверым муаш полшышо рӱдер граждан-влаклан Интерактивный порталыште «Содействие гражданам в поиске подходящей работы» услугым почын. Граждан-влак, кӧ 6 гыч 13 апрель марте палемдалтшаш, телефон дене йыҥгыртен угыч регистрироватлалтыт. Тылеч посна «шокшо линий» пашам ышта. 8 (34779) 4-22-97 номер дене йыҥгыртен пашадымылык шотышто пособийын кугытшо да учетыш шогалтыме порядке нерген йодыш-влаклан вашмутым налын кертыда.

– Арсентий Алексеевич, пашадымылык шотышто пособийын кугытшо нерген рашрак каласкалыза.

– 30 март гыч Российыште РФ правительствын пунчалже дене келшышын, пашадымылык шотышто пособийым тӱлымӧ условий вашталтын. Ындыжым пашадымылык шотышто минимальный пособий – 1500 теҥге, Башкортостан Республикыште район коэффициентым шотыш налын – 1725 теҥге, пашадымылык шотышто пособийын кугытшо – 12130 теҥге, БР-ште – 13949 теҥгеат 50 ыр.

Кажне конкретле случайыште пашадымылык шотышто пособийын кугытшо посна палемдалтеш: пытартыш пашавер гыч тылзе еда тӱлымӧ пашадарын кугытшо; паша кыл жап; гражданинын паша гыч кайыме амалже шотыш налылтеш.

Пашаверым муаш полшышо рӱдерыш толмо жаплан паша кыл 26 арня але пашам ыштыдыме, тыгак посна предпринимательский пашам чарыше але паша дисциплиным пудыртышо граждан-влаклан пашадымылык шотышто пособийын кугытшо Башкортостаныште 1725 теҥге.

Гражданинын паша гыч кайыме амалже шотыш налылтеш.

Рӱдерыш толмо жаплан паша кыл 26 арня деч шагал гын, пашадымылык шотышто пособий икымше 3 тылзын 75 % кугытшо палемдалтеш, пытартыш кум тылзын кокла пашадаржын тӱлаж гыч, вес кум тылзе – 60%.

Пенсийыш лекдыме ийготан граждан-влаклан икымше кум тылзе – пытартыш кум тылзе тӱлымӧ кокла пашадар деч 75 %, вес 4 тылзе – 60%, умбакыже – 45 % (5 тылзе).

Кӱшнӧ палемдыме случайлаште пашадымылык шотышто пособийын кугытшо Россий Федераций правительствын палемдыме пашадымылык шотышто пособийын минимальный размерын кугытшым эртышаш огыл, БР-ште – 13949,5 теҥге.

С. Аркадьева ямдылен.