Эртыше арнян Россий МВД-ын Калтаса районысо пӧлкаштыже эше ик шарнымаш событий – музейын презентацийже эртен

Чын шотеш каласымаште, эше тидым палемдаш кӱлеш, пӧлка пелен музей ончычак пашам ыштен. Но кузе акрет годсо философ-влак ойленыт: «чыла йоген эрта да чыла вашталтеш». Тиде шулдыран ойсавыртышлан эҥерташ гын, полиций пӧлкаште музейын тематикыжым, тушто улшо материал-влакым кумдаҥдаш лийыныт, у экспонат-влак дене пойдареныт. Тидыже нунын миен лектын манаш лиеш.

Театр вешалке гын тӱҥалеш гын, а мемнан полицийнан музейже – коридор гыч. Моторын сӧрастарыме стенд-влак гоч, тышке толшо еҥ-влак ӱмбак районнам нӧлтымӧ жапыште тыршыше милиций пашаеҥ-влак ончат. Нуно ончыкыжым сӧйкуралым кидыш налын кугыжанышын чапшым араленыт.

Милицийыште служитлымаш почетан, неле да лӱдыкшӧ лийын. Кызытат тудо тыгаяк лийын кодеш. А порядкым аралыше-влакын илышышт, мемнан гаяк лийын. Кажныжын шке йӧратыме пашаже лийын: кӧ дыр фотографироватлен, кӧ дыр радиотехникылан шӱман лийын, а кӧ дыр яра жапым муын классический музыкым колышташ кумылан лийын. Ик мут дене каласаш гын, илашым йӧратеныт. Сандене тиде илыш пиалан, тыныс лийже манын, шкеж деч шогышыжым чылажымат ышташ тыршеныт. Лач тидын нерген ойлат музейыште у экспонат-влак. Тошто радиотехникым, электрический да механический бритвым, фотоаппаратым, тӱрлӧ маркан да конструкциян телефон-влакым ончен, элыштына ты але вес отрасльын вияҥмыжым ужаш лийын. А мо вара тыште тӱҥжӧ? Ты экспонат-влак эше кызыт марте тӱз улыт. Арам огыл ойлат: «СССР-ште мо ышталтын – чылажат качестван лийын». Тидым пӧлкан вуйлатышыже Эрнест Ляпустин ончыктен: Риж олаште ыштен лукмо радиоприемникым чӱктен веле, – ик частоташте руш йылме дене ойлымо диктаторын йӱкшӧ шоктен», – «Ойла, Пекин…»

Ик мут дене каласаш гын, тиде изи кабинетыш тичмаш историй саман пурен. Тыште жап эртымым шижде шагат дене шогаш лиеш. Шогаш да илыш нерген шонкалаш…

В. Акиев

Почешмут: Презентаций самоизоляций условийыште эртен. Сандене район администрацийын пунчалже почеш, шекланыме чыла мерым шуктымо.