Проблеме-влак – верысе, задаче-влак – чумыр

Тыгай профессий уло – еҥ-влакын проблемыштым решатлаш полшаш.

Тиде муниципаль служащийын сомылжо. Таче нуно шке профессиональ пайремыштым палемдат

«Могай гына пашам ме огына шукто, чылажымат шотлен пытарашат ок лий», – тыге каласыш кече еда шуктымо пашаж нерген Ульяна Евгеньевна Батыршина, Келтей ялсовет администрацийын пашажым виктарыше.

Чын, тудын пашаже чыла сфера денат кылдалтын манаш лиеш: тиде делопроизводство, шӱкшак реформа, территорийым тӱзатымаш, несанкционированный свалке, пожар безопасность… Чылажымат шотлен пытараш ок лий. А эше «неле ешлашке», шкет илыше кова-коча-влак деке пуралт лекман, школын, Культура пӧртын пашаж нерген пален налман. Ик мут дене каласаш гын, кундемыште мо лийме нерген чылажымат палыман.

– Ме вет, верысе власть, мемнан яллаште илыше еҥ-влак деке эн лишыл улына, – ойла Ульяна Евгеньевна. – Мемнан деке эн ончыч еҥ-влак шке проблемышт дене толыт, мыланна нуно ӱшанат, мемнан деч полышым вучат. А ме кертмына семын нунылан полшышаш, йодышыштым решатлышаш улына.

Ульяна Батыршина чылаштымат шкеныштынлан шотла. Вет шкежат Келтей ялыште шочын. Кеч Нефтекамск олаште кугемын да тунемын гынат, лач тыште, шочмо ялыштыже, «Графское» КФХ ООО-што, «Родина» СХПК–ште икымше профессиональ ошкылым ыштен. Пытартыш 15 ий тудын пашаже муниципаль служба дене кылдалтын – самырык-влак дене пашам намийыме шотышто специалист, Келтей ялсовет администрацийын пашажым виктарыше.

Ульяна Евгеньевна шке пашаштыже сеҥымашлашке шуын: «Совет муниципальных образований РБ» Ассоциацийын почетан грамотыжо, «100 лет Профсоюзу работников государственных учреждений России» юбилей знак, БР Кугыжаныш Погын – Курултайын, БР Рӱдӧ сайлымаш комиссийын Таум каласыман серышыже-влак дене палемдалтын.

А эше Ульяна Батыршиналан эн кугу признаний – ял калыкын пагалымашыже. Кунам тудлан таум ойлат, тудо куана.

Ульяна Евгеньевнам ончалатат, тудын поро кумылан, йомартле улмыжым ужаш лиеш. Тудо пиалан айдеме улеш, шке илышыштыже сеҥымашлашке шуын, шке корныжым ойырен налмыжлан нимынярат огеш ӧкынӧ. Лым лийде пашам ыштыше тиде ӱдырамаш кушеч вийым налеш?

«Йӧратымаште, – ойла Ульяна Евгеньевна, – мый шке ешемым, икшывем-влакым, а нунышт мыйын кумытын улыт, шочмо-кушмо верым, мый тыште шочынам да илем, моткоч йӧратем. Илыме кажне кечын, кеч тудыжо эре пиалан ок лий гынат, мый тыште иктаж-кӧлан кӱлмемым умылем. Тиде пиал огыл мо?».

С. Аркадьева