Все новости
Новости
21 Апрель 2020, 21:00

«УЖХ» ООО Калтаса да Краснохолмский селалаште шуко пачеран пӧрт-влакын подъездыштым дезинфицирующий раствор дене обрабатыватла

Роспотребнадзорын темлымыж почеш, коронавирус деч профилактика дезинфекцийым кызыт чыла верат эртарат. Южо вере уремым, площадьым, сквер-влакым обрабатыватлат.

Роспотребнадзорын темлымыж почеш, коронавирус деч профилактика дезинфекцийым кызыт чыла верат эртарат. Южо вере уремым, площадьым, сквер-влакым обрабатыватлат. Поснак тушто, кушто инфекций шарлаш тӱҥалын да ты вирус деч шуко еҥ черланен. Мемнан районышто ты шучко чер шарлен огыл гынат, дезинфекцийым эртарат. Калтаса да Краснохолмский селалаште кызыт шуко пачеран пӧртлаште подъезд-влакым обрабатыватлат.
– Мемнан организацийна чылаже шуко пачеран 156 пӧртым, тышеч Краснохолмский селаште 119-ым да райрӱдыштӧ 37-ым, обслуживатла, – ойла «УЖХ» ООО-ын вуйлатышыже Альберт Камидуллин. – Кызыт подъезд-влакым кумшо гана дезинфицироватлена. Икымше гана ты сомылым ме 2-3 апрельыште шуктышна, кокымшыжым – ты тылзынак 8-9 числаштыже. Арнялан кажне подъездым обрабатыватлена манын каласаш лиеш. Дезинфекционный группын пашаж нерген калыклан ончылгоч ойленна ыле, подъездын омсалашкыже увертарымашым пижыктенна. Эше тидым палемдаш кӱлеш, калык ты пашан кӱлешлыкше нерген сай умыла.
Краснохолмский селаште дезинфекционный группышто кум еҥ пашам ышта, Калтаса селаште – 2. Подъезд-влакым обрабатыватлыме жапыште нуно аралыше костюм, вӱдыжгӧ пурыдымо перчаткым, респиратор ден герметичный очким чият. Альберт Мензаирович кузе палемда, аралыме костюмын ик комплектше ончычат лийын, а молыжым писын гынат налаш пернен.
Дезинфикционный пашам тӱҥ инженер Айдар Нургалиев вуйлата.
– Подъезд-влакым обрабатыватлаш ме хлорактивный соединений тӱшкаш пӱрышо дезинфицироватлыше средствам кучылтына, тудым Роспотребнадзор темла, – каласыш тудо. – Раствор-влакым инструкций почеш ямдылышна. Вет тудо айдемын тазалыкшылан лӱдыкшӧ лийшаш огыл. Кызытсеш вуйшиймаш пурен огыл.
Дезинфекционный группа, а тушко Марсель Тимофеев ден Зиннур Курбанов пурат, 15 да 16 апрельыште Калтаса селаште шуко пачеран пӧрт-влакын подъездлаштыже дезинфекцийым кумшо гана эртарат.
– Арнялан ик гана обрабатыватлена, шукырак ме дезинфекций пашам шуктен огына керт, – ойла Альберт Камидуллин. – Лӱдыкшӧ уло. Сандене мый шуко пачеран пӧртлаште илыше еҥ-влак деч дежурствым ышташ йодам. Тошкалтышым да площадкым мушмо дене пырля тыгак кажне кечын перилым, омса кылам, магнит замокын кнопкыжым, кушто айдемын кидше логалеш, дезинфицироватлыме средства-влак дене обрабатыватлаш йодына. Лач тыге гына ме шке тазалыкнам да илышнам арален коден кертыда.
Ю. Шамсутдинов