Дмитрий Зайнуков тале организатор ыле

Вашке Кугу Сеҥымашын 75 идалыкше лишемеш да мый Кугу Ачамланде сарын ик участникше Зайнуков Дмитрий Зайнукович нерген ойлынем. Тудо Кугу Агытан ялыште шочын.

Агытан мланде кумдан палыме шуко еҥым ончен куштен. Тиде киндым ончен куштышо, вольыкым ончышо еҥ-влак. Нуно кӱкшӧ правительственный награде-влак дене чапландаралтыныт. Эртыше курымын 80-ше ийлаштыже тиде производственный бригадыште у технологий-влак шыҥдаралтыныт. Тыште пошкудо районла гыч усталык дене палдырнаш толыныт. Кушкылым ончен куштымаште, вольыкым ашнымаште кӱкшӧ результатлашке шуаш тыршеныт.

1959 ий гыч сулен налме канышыш лекме марте ты производственный участкым Зайнуков Дмитрий Зайнукович вуйлатен. Колхоз производствын чын организаторжо, кресаньык-влак тукым гыч улеш. Мыламат тиде чапле айдеме дене пашам ышташ, ялозанлык пашалан тунемаш пӱрен. Кеч мый электрогазосварщик лийынам гынат, кум ий жапыште механизатор, комбайнер-влак пелен тыршенам. Дмитрий Зайнукович паша деч посна ӧрдыжтӧ коштын огыл, кӱлеш годым грузчик, слесарь да трактористат лийын. Тидымак участковый бригадир дечат йодын. Южгодым мый тудым Чапаев дене таҥастаренам. Критический тат годым, кунам иктаж-могай йодышым решатлымаште лӱддымашлык да эрык кӱлын, тудо Чапаев семын эре ончылно лийын. Кеч Дмитрий Зайнуков Чапаев гаяк академийым тунем лектын огытыл, тудо тӱҥалтыш класслаште гына шинчымашым поген, туге гынат кӱшыл образованиян кеч-могай агрономым киндым чын ончен кушташ туныктен кертын. Тудо пӱртӱс деч организатор да киндым ончен куштышо еҥ лийын.

Дмитрий Зайнуков пелен шуко производственный объект, гараж, ферме, шурным коштымо, шурным аралыме идым, АВМ – ужар массым тыгыдемдаш, автозаправочный станций, пакча-саскам аралыме вер да молат чоҥалтыныт. Тудын тыршымыж дене Кугу Ачамланде сарын участникше-влаклан обелискым чоҥымо лийын.

Зайнуков пашам ыштыме жапыште Агытан ял гыч шукыжо паша орден дене палемдалтын. Комбайнер Михаил Тимиряев Паша Йошкар Знамя орден дене чапландаралтын, ферме вуйлатыше Р.Н. Хайбуллина – Паша Йошкар Знамя да Октябрь Революций орден-влак дене.

Шочмо элна Дмитрий Зайнуковын пашажымат кӱкшын аклен. Тудо Паша Йошкар Знамя да Октябрь Революций орденже, ВДНХ-ын шӧртньӧ да ший медальже, тыгак моло правительственный награде-влак дене палемдалтын.

Зайнуков Дмитрий Зайнукович теве тыгай айдеме лийын. Иктым гына чаманен: шке гаяк ӱшанле еҥым туныктен шуктен огыл. Тыгак ончыко каяш тыршыше, чумыр паша верч ойгыртышо еҥым. Дмитрий Зайнукович деч вара тудын тынар ий тыршен ыштыме пашажым шалатен пытареныт. Ончычсо озанлык поянлыкым ужален да шалатен пытареныт. Пытартышыже шурным коштымо агрегат лийын. Тудыжымат кӱртньӧ пудырго семын ужаленыт. Э-эх. Чон коржеш. Кунам дыр кумдан палыме Ильич лӱмеш озанлыкын Агытанысе производственный бригадын мучашыже ойган лийын. Ты жапыште тудо илыше лиеш ыле гын, бригадым утарен кода ыле.

Назиб Арсланов,

Краснохолмский села.