Школышто сеҥымаш гыч – илышыште сеҥымаш марте

Айдемын илышыштыже эн тӱҥжӧ школ гыч тӱҥалеш. Шуко еҥлан школ – тиде кокымшо пӧрт. Арамлан огыл кугыеҥ-влак тыге ойлат: школышто тунемме ий-влак – тиде илышыште эн пиалан жап. Изи улмыж годымат эше айдеме кӧ лияш шона, а могай профессийым ойырен налаш тудлан школ полша.

Мыланем гын, «Словесное кружево» журналистика кружокышто занятий-влак – тиде литературный творчествыште кугу школ. Поснак кӱлешан, кунам тыйын пашадым моло-влак аклат. Тыгеракын, 2019 ий апрельыште Башкортостан Республикыште («Икоян Россий» Всероссийский партийын Башкортостанысе региональ пӧлкажлан кӧра) «Кажне пӧртыш уверым» региональ проект тӱҥалын. Тыште мемнан школнат чолган участвоватлаш лийын (поснак Уфа олашке миен толаш да информаций дене лаштык-влакым лукташ техническй полышым ончыктышо З.В. Максимовалан, партийын верысе пӧлкажын исполнительный секретарьжылан, кугу тау). Ме тиде конкурсышто районышто веле огыл, тыгай республикыштат сеҥенна. Тидлан пиална мучашдыме лийын.

Мартыште «Икоян Россий» партийын региональ исполкомыштыжо «Кажне пӧртыш уверым» партий проектыште чолган участоватлыше, газетын эн сай редакторжо ден журналистше-влакым чапландареныт. Мый да мыйын наставник-кураторемым Уфа олаште эртыше чапландарыме пайремыш ӱжыныт. Тӱҥалтыште мемнам «Башкортостан» ТРК-ыш экскурсийыш ӱжыныт, ме студийым ончен лекна, тыште мемнан йӧратыме передачына-влак сниматлалтыт, тыгак «Увер-влак» студийыште лийна. Телеканалын тӱҥ редакторжо Гузель Хамитова съемко, кадр деч ӧрдыжтӧ пашан секретше нерген ойлыш, интервью жанрыште передачым ыштыме шотышто мастер-классым ончыктыш. Умбакыже, ындыжым исполкомышто, мемнам «Икоян Россий» партийын региональ пӧлкажын секретарьжын икымше вуйлатышыже Константин Толкачев вашлие. Константин Борисович кажне самырык корреспондентын пашажым тӱткын колышто да каласыш: «Икоян Россий» партий кушкын толшо тукымлан ончыкыжымат кугу вниманийым ойыраш тӱҥалеш». «Икоян Россий. Башкортостан» газетын тӱҥ редакторжо Елена Якупова партийный изданийын лаштыклаштыже лӱмын рубрикым ышташ темлен, тыште самырык корреспондент-влакын эн сай статьяштым савыкташ тӱҥалыт.

Мучаште чапландарыме пайрем эртыш. Ме иканаште кок наградым нална: Башкортостан Республикыште «Кажне пӧртыш уверым» региональ проектым илышыш сай шыҥдарыме шотышто Дипломым да Башкортостан республикыште «Кажне пӧртыш уверым» региональ проектым илышыш шыҥдараш полшымылан Таум каласыман серышым. Тыгак мемнан школышто журналистика кружоклан лаштык-влакым лукташ принтерым пуэныт, а мый гын, пӧлек сертификатым да илышыште мондаш лийжыме кечым нальым.

Амалия Мусина