Калтасамыт башкир йылме дене Тӱнямбал диктантым возымаште чолган участвоватленыт

25 апрельыште Башкир йылме дене Тӱнямбал диктантым возеныт. Организатор-влак кузе увертареныт, Башкирийын ола ден районжо, Российын 18 регионжо, 24 эл гыч 350 тӱжем утла еҥ тиде образовательный акцийыште участвоватлен. Баймак ола гыч ик участниклан улыжат 5 ий лийын, а Ишимбай район гыч эн кугыеҥлан – 96 ий. Диктантым куд ий почела возат, а тений эпидемиологический ситуацийлан кӧра онлайн-форматыште эртареныт.

Калтаса районышто илыше калыклан башкир йылме дене шке шинчымашыштым тергеныт. Акцийыш туныктышо, тунемше, студент, нунын ача-авашт ушненыт. Тыште кажныже шке шинчымашыжым терген кертын. Диктантым возашланат кум тӱрлӧ текстым ямдылыме лийын: тӱҥалтыше уровень дене башкир йылмым палыше-влаклан, ты йылмым сай палыше да йӱдвел-касвеллан башкир йылме диалект дене кутырышо-влаклан. БСТ телеканалыште, тыгак социаль сетьлаште тура трансляций эртен.

Моло-влак дене пырля 1 №-ан Калтаса кыдалаш школышто 7 б классыште тунемше Зайнетдинова Заринат диктантым возен. Тудо шке шинчымашыжым икымше ужашыште терген. Зарина башкир йылме дене диктантым икымше гана воза. Нунылан Нур Галимовын «Вернувшийся с фронта курай» произведенийже гыч ужашым темлыме лийын. Тыште тушман ваштареш кредалмаште башкир салтакын подвигше нерген возалтеш. Тӱҥ герой Гайфулла Сарбаев калык инструмент – курай дене башкир семым йоҥалтарен. Тидын дене тудо кредалмаш-влак коклаште салтак-влакым лыпландарен. Курай, чын салтак семын, фронт гыч «таза-эсен» пӧртылын.

– Мый диктантым возымем годым, шкемым мемнан республикынан ужашыже семын шижынам. Вет йылме калыкым иктыш ушаш полша, – каласен Зарина.

Райпӧлкан данныйже почеш, мемнан район гыч башкир йылме дене 493 еҥ диктантым возен. 3 №-ан Краснохолмский кыдалаш школ гыч чолган участвоватленыт. Тыште 108 тунемше ден туныктышо диктантым возен, 1 №-ан Калтаса КШ гыч – 79, 1 №-ан Краснохолмский КШ гыч – 78, 2 №-ан Краснохолмский КШ гыч 65 участник лийын.

Иктешлымашым 30 кече гыч https://bashkdictant.ru/ сайтыште савыктыме лиеш.

Диктант 2020-ын чыла участникшылан сайтын личный кабинетышкыже электрон сертификатым колтымо лиеш.

С. Аркадьева