«Оралтыште ушкал уло гын, ӱстембалне кочкыш лиеш», - тыге ойла Калтаса села гыч Елена Нуриахметова

Елена Андреяновна Нуриахметова – шуко икшыван ешыште йӧратыме ава. Нуно 2017 ийыште ушкалым налыныт да тудлан Ромашка лӱмым пуэныт. Тылеч ончыч нунын кум ий ушкалышт лийын огыл. Телым кумшо гана презылен. Эше тидым палемдаш кӱлеш, ешыште тудым моткоч йӧратат.

– Ушкалым кугыжаныш деч социаль контракт почеш нална, – ойла Елена Андреяновна. – Тыгай полыш илышын неле ситуацийже гыч веле огыл лекташ, тыгак оксам ыштен налаш ешартыш полыш. Палыме еҥ-влак деч шуко икшыван еш-влак тыгай льгота дене пайдаланен кертме нерген пален налмеке, контрактым ышташ лийна.

Нуриахметовмыт ушкалым налаш 25 тӱжем теҥге оксам кум ий ончыч, нужнан илыше шуко икшыван еш семын налыныт. Чынжым каласаш гын, тушко эше шкеныштын 5 тӱжем теҥге оксаштым ешараш пернен. Радислав ден Еленан ныл икшывышт уло. Эн кугу Кирилл эргыштлан 20 ий, Нефтекамск олаште «Городская недвижимость» ОАО-што электромонтажник лийын пашам ышта. Артур эргыж ден Регина ӱдыржӧ 1 №-ан Калтаса кыдалаш школышто 9 да 8-ше класслаште тунемыт, а эн изи Алеша эргышт «Рябинушка» йочасадыш коштеш. Радислав Михайлович «НефАЗ» ПАО-што пашам ышта. А шкеже – Елена Андреяновна Калтаса селасе райрӱдӧ эмлымверыште врач-терапевтын участковый медшӱжарже лийын тырша.

– Нуно мыйын эҥертышем, полышкалышем, – куанен ойла шке шочшыжо-влак нерген Елена Нуриахметова. – Нунын деч посна мый тыгай вуйын шогыман пашалан ом тошт ыле. Социаль контракт почеш ушкалым налмаш – тиде пел паша. А вет тудым эше ончаш, пукшаш, кум ий социаль полышым ончыктышо рӱдерыш отчетым ышташ кӱлеш. Эше тидым палемдыме шуэш, ты программыште текшырымаш да отчетность формым палемдыме. Оксам налме деч вара кум ий гражданинын контракт условийым кузерак шуктен толмыжо текшыралтеш. Тугеже, тений Нуриахметовмытын ты срокышт лектеш.

– Чын, контрактын срокшо лектеш, – умбакыже ойла Елена Андреяновна. – Теве майыште ме пытартыш отчетым ыштена да Ромашкына мемнан дене кодеш.

Социаль контракт почеш оксам нужнан илыше чыла огыл ешлан ойыралтеш. А тудлан, кӧ ты полыш дене пайдаланалташ ямде улеш. Калтаса районышто еш-влаклан социаль полышым ончыктышо службын вуйлатышыже Светлана Мавлявиевна Хамидуллинан мутшо почеш, ты полыш посна сурт озанлыкым кучаш, пашаверым кычалаш, профессионал образованийым але ешартыш профессиональ образованийым налаш, посна предпринимательский пашам намияш ончыкталтеш.

Тыгак кугыжаныш полыш моткоч кӱлешан. Тольык тудо ӱшанле кидыш логалшаш. Мутлан, Нуриахметов ешыште тыгак лийын. Нуно посна сурт озанлыкым кучаш контрактым оформитленыт. Таче нунын ушкалышт, пашмакышт, презышт да чывышт уло…

– Ушкалым налме шотышто нимогай нелылык уке, – ойла Елена Нуриахметова. – А ындыжым мемнан ӱстелыштына свежа шӧр, торык, сыр, шыл, коптитлыме коя, муно. Тиде кажне кечын тыршыме пашанан результатше. Кузе ойлат, паша деч посна колым пӱя гыч лукташ ок лий. Социаль контракт шуко икшыван еш-влаклан сай полышым ончыкта. Мый гын, нужнан илыше шуко икшыван еш-влаклан, социаль контрактын ыштыме вариантше-влакым ончен лекташ йодам. ™шаныза, нимынярат ӧкынаш огыда тӱҥал. Эн тӱҥжӧ, ӧрканыман огыл, Юмо полшымо дене чыла миен лектеш.

О. Айгильдина.