Шуматкечын, 25 апрельыште, «Библиойӱд–2020» Всероссийский акций эртен, тушто Калтаса районын библиотекыже-влакат участвоватленыт

Историйыштына икымше гана ий еда эртыше акций у форматыште эртен. Пӱтынь эл мучко коронавирус инфекций шарлымылан кӧра, чыла мероприятийын организаторжо-влак тудым онлайн-марафон семын эртареныт. Лудшо-влак дене пырля погынен кутырымо жап сагыналтеш, туге гынат, тыгай формат дене эртыше акцият оҥай, пайдале лийын.

Район библиотеке-влак социаль сетьлаште шке онлайн-площадкыштым ыштеныт. Ты акцийыш тыланыше кажне еҥ ушнен кертын, тидын годым пӧрт гыч лекде. «Библиойӱдын» тӱҥ темыже – Кугу Ачамланде сарыште Сеҥымашлан 75 ий темме юбилей. Акцийын слоганже тыге йоҥген – «Мемнан Сыҥымашнан шарнымашыже». Интернет-площадкылан материал-влак военный, краеведческий да литература тематикылан лӱмдалтын лийын. Выставке, инсталяций, ветеран-влак нерген видео-ойлымаш, литературный лудмаш, концерт программе, мастер-класс-влак – тиде темлыме онлайн-акцийын ужашыже веле.

Калтаса селасе йоча модель библиотеке Совет Ушемын Геройжо-влак нерген ойлен, нунын лӱмышт дене райрӱдӧ уремлам лӱмденыт, йоча-влакын сӱретыштын выставкыштым ямдыленыт, а мастер-классыште ветеранлан саламлымаш открыткым ышташ тунемыныт.

Район библиотекын площадкыже «Сар лийын. Сеҥымаш лийын.» район конкурсын выставке-инсталяцийже дене палыме ыштен. Тыште Кугу Ачамланде сарын участникше-влакын шарнымашышт йоҥген, сар нерген ойленыт. Чыла тидым туныктышо-влак Л.А. Апсаликова ден М.И. Илтубаева ямдыленыт.

Краснохолмский библиотека Кугу Ачамланде сарын участникше-влак нерген видео-ойлымашым ямдыленыт. Книга инсталяцийыште тӱҥ верым Кугу Ачамланде сарын участникше Георгий Дмитриевич Пятан наградыже-влак дене костюмжылан ойырымо лийын. Тыгак Сеҥымаш кече лӱмеш видео концертым эше ик гана ончаш лийын.

Кӧтерем библиотека шке виртуаль площадкыштыже «Ончычсо жапын геройжо-влак нерген» программым вераҥден. Тыште самырык лудшо-влакын сар нерген почеламут-влакым лудмышт лийын. Кинозалыште военный фильмым ончаш темленыт. А мастер-классыште георгиевский ленте гыч брошьым ямдыленыт.

Ты акцийыш библиотекарь-влакын ямдылалтмыштым чылажымат ойленат пытараш ок лий. Туге гынат видеоматериалым, книгам, фильмым, почеламут ден ойлымаш-влакым эше ончаш лиеш. Тидлан социаль сетьлашке районысо библиотека-влакын сайтышкышт пураш да ончаш лиеш.

С. Аркадьева.