Эртыше арнян Калтаса район республике гыч илалше еҥ-влаклан продукт набор-влакым налын

Изарнян районыш продуктовый набор-влакым конденыт. Тудым 65 ияш да кугурак ийготан пенсионер-влаклан, кӧ минимальный пенсийым налеш, шалатыме лиеш. Лач нунылан кызыт коронавирус эпидемий да самоизоляций режимлан кӧра, а тудыжым текшырыман, полышым ончыктыман. Ты продуктовый набор-влак моткоч кӱлешан улыт. Тушкыжо мо вара пура?

– Продуктовй наборыш шем шыдаҥ, рис, сгущенко, кушкыл ӱй пура, – ойла ийготыш шудымо икшыве-влаклан «Центр» клубын вуйлатышыже Гульфия Нагимовна Галиханова. – Тыгак пурса, печене, чай, геркулес чумырка, шекар. Пакетлаште тӱҥ шотышто мемнан верысе, башкирийыште ыштен лукмо продукт-влак.

Кажне набор 6,5 килограмм нелгытан. Коронавирус профилактике чыла мерым текшырыме почеш, эртыше арнян пенсионер-влак пакет-влакым налаш тӱҥалыныт.

Чылаже спискыште 497 адрес.

– 65+ да 11500 теҥге марте пенсийым налмым шотыш налын, БР-ын еш, паша да калыкым социально аралыме министерстве спискым ыштен, – ойла район администраций вуйлатышын социаль йодыш, кадр да внутренний политике шотышто алмаштышыже Алексеева Елена Анатольевна. – Таче Башкортостан Республикыште общероссийский акций почеш, моткоч кӱлешан «Продуктовый полыш» проект илышыш шыҥдаралтын. Эше тидым палемдаш кӱлеш, проект кугыжаныш программылан ок шотлалт, тиде мемнан республике деч порылык организацийын счетшо гыч адресный полыш. Сандене тыгай полышым чыла пенсионерлан ончыкташ ок лий.

Е. Алексееван мутшо почеш, мемнан районыш 500 теҥгелан продуктовый набор-влак пуреныт. Илалше еҥ-влаклан нуным волонтер-влак шалатен лектыт, тидын годым чыла санитарно-гигиенический правилым шуктымо лиеш.

Таче районышто илыше калык, тидын годым чыла тӱня, неле ситуаций дене вашлиялтын, тудыжо шуко еҥлан раш огыл да лӱдыкшӧ. Сандене, Е. Алексееван мутшо почеш, «65+ продукт полыш» деч посна лишыл жапыште мемнан районыш республике деч нужнан илыше шуко икшыван еш-влаклан полышым ончыктымо лиеш. Икшывылан илен лекташ ситыше минимум 9200 теҥге деч шагал да кӧ тылзе еда икшыве-влаклан пособийым налеш, нунылан ты полыш ончыкталтеш. Тыгак илышын неле ситуацийышкыже логалше-влакланат продукт наборым колтымо лиеш. Чыла тиде полыш «Продукты Башкортостана. С заботой о вас» порылык проектлан кӧра ончыкталтеш. Тидлан «Икоян Россий» партий линийын секретарьже, БР вуйлатыше Радий Хабиров тӱҥалтышым пыштен.

О. Айгильдина.