Кугымӧрым эмлена

Кугымӧрым кошкышо, кылмыше лышташла деч эрыктыман. Кушкыл воктенысе 3 см кӱжгытан рокым кораҥдыман, тыге телылан кодшо да эҥгекым кондышо тӱрлӧ копшаҥге деч утледа.

Йыраҥыште рокым пушкыдемдыман да пила шӱкым, тыгыде олымым але торфым шавалтыман. Самырык лышташ шочаш тӱҥалмеке, ушкал терыс вӱдым кажне кушкыл йымак оптыман. Кугымӧр шудо ынже черлане манын, тушко да тудын йыр мландыш медный купорос растворым шавыман.

Вӱдым арнялан ик гана оптыман. Ончыч шудышкыжат шаваш лиеш, а пеледме да саска лийын шумеке, вӱдым шудыш логалтыман огыл.