Калтаса ужара
+17 °С
Пылан
Все новости
Новости
1 Ага 2020, 23:00

«Восход» СХК-ын пашаеҥже-влак пасу пашам удан огыл намият

«Восход» СХК - эн кугу озанлык. Тыште тӱжем утла вуй вольык ашналтеш, тугеже кум тӱжем утла гектар мланде кумдыкым обрабатыватлат.

«Восход» СХК - эн кугу озанлык. Тыште тӱжем утла вуй вольык ашналтеш, тугеже кум тӱжем утла гектар мланде кумдыкым обрабатыватлат. Тений шыжым икияш культурым гына 2150 гектарыште ӱдаш палемдат. Тиде шыдаҥым, шожым да пурсам, тыгак кокияш шыдаҥым. Силослан кукурузым 265 гектарыште ӱдымӧ лиеш. Шукияш шудо нергенат мондымо огыл – 100 гектарыште люцерным да 40 гектарыште козлятникым ӱдымӧ лиеш. Озанлыкыште ий еда шукияш шудо пасу-влак уэмдалтыт.
Кызыт озанлыкын пасулаштыже вӱдыжгым петырыме паша мучашлалтеш. Ты пашашке тырмалыме шым агрегатым ушымо лийын, тышеч кумытшым кугу куатан Т-150 тракторыш пижыктыме, а кок агрегатым – гусеничный ДТ-75 да колесан МТЗ-82 тракторлашке.
Эше тидым палемдаш кӱлеш, Т-150 трактор-влакым мужыраҥдыме колеса-влак дене куралаҥдыме, тудыжо куралмаште давленийым иземдаш полша.
– Апрель тылзын икымше декадыштыже, лум шулымо деч вара, ме агрегат-влакым пасулашке лукна. Писын гына тырмален лектына да ӱдаш тӱҥалына манын шонышна, – ойла озанлыкын тӱҥ агрономжо Егор Зайнетдинов. – Но шонымына семын миен ыш лек. Игече шке вашталтышыжым пуртен. Йӱр ден лум, йӱдым кылмыктымаш кок арнялан ончычрак пашам ышташ тӱҥалмынам чактарыш. Ындыжым пасу пашам ончычсо агротехнический жапыште эртарена манаш лиеш. Ик арнялан ончычрак, ик арнялан варашрак – эн тӱҥжӧ мланде вӱдыжгӧ улмо годым ӱден кодаш.
Апрельын пытартыш кечылаже начар огыл шога. Тиде пасу пашаште тыршыше еҥ-влаклан йӧным пуа. Механизатор-влак кызыт ты игече дене пайдаланен, эр гыч тӱҥалын кас пычкемыш марте тыршат. Т-150 трактор дене Алик Яндимиров, Юрий Изибаев, Гера Баюршин, ДТ-75 дене Виталий Кудайметов, Вячеслав Байтимиров да Руслан Ильбарисов удан огыл тыршат. Нуно чыланат уста, шке пашаштым сай палыше механизатор улыт.
Вӱдыжгым петырыме деч вара вигак пасушко кугу куатан кок «Бюллер» трактор импортный, Германийыште ыштен лукмо «Хорш» ӱдымӧ агрегат-влак дене лектыт. Мландым ӱдымӧ деч ончыч культивироватлаш ок кӱл. ™дымӧ агрегат-влакым лӱмын дискан агрегат да каток-влак дене куралаҥдыме. Иканаште кум паша шукталтеш – культивироватлымаш, ӱдымаш, такыртымаш. «Бюллер» трактор дене механизатор-влак Николай Исашев да Юрий Изибаев пашам ышташ тӱҥалыт. Нунын мастарлыкышт нерген возаш ок кӱл манын шонем, тыгай трактор-влакым шке пашаштым моткоч сай палыше-влаклан гына ӱшанен пуат.
«Восход» СХК-ын пашаеҥже-влак районышто шукылан палыме улыт. Нуно ий еда кӱкшӧ лектышан пырчан да кормалык культура-влакым ончен куштат. Теният сеҥымашлашке шуаш тыршат.
– Ме чыла агротехнический мероприятийым жапыште да сайын шукташ тыршена, – ойла Егор Камитдинович. – Эртыше шыжым чыла кумдыклаште мландым кылмаш курал кодымо. Тидым огына ыште гын, сай лектышым налаш ок лий. Урлыкаш-влак мемнан тӱҥ шотышто икымше да кокымшо ийын, ӱдымӧ деч ончыч чер да шукшкопшаҥге деч химикат-влак дене обрабатыватлена. Тыгак минераль ӱяҥдыш дене пайдаланымаш сай лектышым пуаш полша. Ме аммиачный селитра ден нитроаммофка дене пайдаланена.
Ю. Шамсутдинов.