Тылыште тыршыше Ванюшкина Ольга Исламгареевна

Корнем эн ондак Ольга кокай деке шуйныш. Мыйым кумшо ӱдыржӧ, Дина, школышто пырля тунемме йолташем, вашлие. Шуко жап йӱдвел Когалым олаште илымек, сулен налме канышыш лекмеке, пелашыж дене кызыт ялышке илаш толыныт. Нунак аваштым ончат. Ванюшкина Ольга Исламгареевна 1931 ий 11 ноябрьыште Калтаса районысо Пекшык ялеш 5 икшыван ешеш кумшо икшыве лийын шочын. Ачажым, Исадыков Исламгарайым, война тӱҥалтышын икымше кечылаштыжак сарыш налыныт. Тудо чыла нелылыкым сеҥен, тул-вӱд вошт эртен, пленыштат лийын, но садак 1947 ийыште шочмо ялышкыже сеҥымаш дене пӧртылын. Колхозышто тӱрлӧ сомылым шуктен, 1987 ийыште ӱмыржӧ кӱрылтын, тунам 87 ияш лийын. Ольга акайын аваже, Ишинбаева Кульемыш, Шоръял ялын ӱдыржӧ лийын, ту жапыште ӱмыржым Пекшык ял каче дене ушен. Сар тӱҥалме годым Ольга кокайлан 10 ий темын. Тудо, Киебак школышто куд классым тунем лекмеке, колхоз пашашке ушнен. Кушкын толшо йочалан тӱрлӧ пашам ышташ верештын. Изи ӱдыр сорла дене уржам тӱредын, шудым поген, вольыкым ончен, моло пашамат шуктен.

Сар жапыште ниго теммеш кочкын огыл, поген налме шурным колхоз чыла войнашке колтен. Изиш ложашым пуэныт гын, тудым шолшо вӱдеш пудыратен, нужым, коншудым, шӱйшӧ пареҥгым ешарен шолтен кочкыныт. Тыге жап эртен, сар пытен. 1952 ийыште декабрь тылзыште Кугу Ачамландылык сарын участникше Ванюшкин Анатолий Иванович дене ушненыт. Ту жапыште Анатолий павай, Стерлитамак техникумышто агрономлан тунем лектын, кызытсе Краснокам районысо Пураялыште Ворошилов лӱмеш колхозым вуйлатен. Рвезе еш Киебак ялеш верланен. Тыныс илыш жапыште Ольга кокай Ильич лӱмеш колхозышто тӱрлӧ пашам шуктен: шорык кӱтӱм кӱтен, колхоз пакчаште тыршен, сӧсна комплексыште, шурно коштымаште ыштен. 1981 ийыште пенсийыш лекмекыжат, эше 5-6 ий тӱрлӧ шала пашам шуктен. Сар жапыште шкенжым чаманыде тыршыме пашажлан шуко медаль дене палемдалтын, нунын коклаште эше «Ава чап» медаль волгалтеш. А пелашыже, Анатолий павай, тиде колхозыштак бухгалтер лийын ыштен, пенсий деч ончыч ятыр ий ревизионный комиссийым вуйлатен, тидын коклаштак сельпошто ревизор, Краснохолмский УБР-ште помбур, Калтаса лесхозышто лесник лийын – икманаш, кушко колтеныт, тушто тыршен. Нуно шкешт гаяк пашам йӧратыше 6 икшывым ончен куштеныт: 5 ӱдыр да 1 эрге. Чаманен каласаш логалеш, Ванюшкин Анатолийын ӱмыржӧ 2004 ийыште к¢рылтын, шукерте огыл Олег эргышт ош тӱня дене чеверласыш. Молышт чылан илышыште шке верыштым муыныт да элнан тӱрлӧ луклаштыже илат. Ке‰ежлан гын шочмо суртышкышт рӱж погынат. Поро чонан кувава чылаштым йӧрата, пагала. Ольга кокайым кызыт 13 уныкаже да 22 кугезе уныкаже куандарат.

Л.Л. Тамиева, Киебак ял.