Шамыкаев Самигулла Шамыкаевич сеҥымаш дене пӧртылын

Шамыкаев Самигулла Шамыкаевич 1924 ий 13 августышто Башкир АССР-ын Калтаса районысо Кӱшыл Качмаш ялыштыже шочын.

1942 ийыште Калтаса районысо военкомат гыч армийыш налыныт. Алкиношто военный ямдылалтмашым эртен. Радиосвязист специальностьым налын, тыгак младший сержант званийым пуэныт. 1-ше Белорусский фронтын 155-ше артиллерийский составыштыже кредалын. Курский дугаште кредалме годым боевой крещенийым налын.

Днепр эҥер вес могырышто верланыше тушманын тылже гычын мемнан командованийлан шергакан сведенийым конден. Днепр эҥерым ик серже гыч весышке икмыняр гана ийын лекташ кӱлеш лийын. Ялыште шочын-кушшо марий рвезылан тиде пеш кугу нелылык лийын огыл. Тиде подвигым шуктымыжлан III-шо степенян Чап орден дене палемдалтын и 10 кечым канаш пуэныт.

Поляк-влакын Познань олаштым утарыме годым пеш кӱлешан разветданный-влакым мемнан командованийлан пуэн. Но ик кечын лӱйкалымашышке логалын да кум пулевой раненийым налын – кокытшо йолышто и икте – оҥышто. Тиде лӱйкалымаш годым шкенан армий могырыш нушкын толын шуктен. Сусыргымаш дечын Саратов олаште эмлалтын. Эмлалтме деч вара 1946 ий марте Саратов оласе комендатурышто служитлен.

Тыныс илыш толын шумеке, шке шочмо-кушмо Кӱшыл Качмаш ялыштыже тыршен. Варажым пенсийыш лекмыж марте шке ялыштыжак, «За коммунизм» колхозышто, пашам ыштен. Дарья ватыж дене пырля вич икшывым ончен куштен.

2000 ий 10 майыште Сеҥымаш кечым вашлиймек, 76 ияш Шамыкаев Самигулла Шамыкаевичын ӱмыржӧ кӱрылтын.

Шкенжын сарыште коштмо корныж нерген кочам уло кумылын мыланна, уныкашт-влаклан, каласкала ыле. Туге гынат ме, изи йоча-влак, тидым ойлымыжым вуйыш пыштен коден огынал. Кочам пеш весела, поро кумылан айдеме ыле. «Порт-Артур» мурым уло йӱкын, шӱм-шокшыж дене мураш йӧратен.

О.А. Петрова, Кӱшыл Качмаш ял.