Биктимировын кресаньык-фермер озанлык пасулаштыже икияш культурым ӱдат

Тиде кечылаште озанлыкысе пасулаште эр гыч тӱҥалын кас пычкемыш марте трактор йӱк шокта. Вич агрегат пашаште улеш. Механизатор Андрей Пайтуллин ДТ-75 гусеничный трактор дене вӱдыжгым петырымаште тырша. Алексей Янсубаев Т-150 трактор дене мландым культивироватла, пасум ӱдаш ямдыла. Тудын деч вара вигак МТЗ-80 кок трактор дене ӱдат. Кок сеялкан трактор дене Геннадий Биктимиров, иктат пелан дене Алексей Айдаков. ӱдашӧ лийын Руслан Ислибаев, Валентин Изергин да Олег Яметов тыршат.

™дымӧ агрегат-влак деч вара мландым МТЗ-80 трактор дене Минилбаев Илья петыркален кая.

Кӧкыш ялысе мланде пашаеҥ-влаклан икияш культурым 700 гектарыште ӱдаш кӱлеш. Герман Афанасьевичын 570 гектар мландыштыже да Геннадий эргыжын 150 гектар мландыштыже. Герман Биктимиров шкаланже сай сменым ямдыла. Кеч-могай ялозанлык технике дене Геннадий пашам ыштен мошта, ынде теве озанлыкым вуйлаташланат тунем шуэш.

– Эн ончыч ме 20 гектарыште шӱльым ӱдена, – каласкала Герман Афансьевич. – Кызыт шожым ӱден пытарена. Тудым 254 гектарыште ӱдымӧ лиеш. Тыгак 311 гектарыште шыдаҥым да пурса ден шожым ӱдена. Мемнан дене мо кушкеш, чыла ӱдена. Тыгак 60 гектарыште кокияш уржа сайын лектын.

Кодшийысе шошым шарналтышым. Районысо агрономический комиссий дене пырля озанлыкласе пасулашке лектын коштынна – кокияш лектышым, тыгак лектыш кылмымым тергенна. Тунам Биктимировын пасуштыжо кокияш уржа телым эн сай «илен лектын». Ужар ковер семын нуно пасум петыреныт ыле. Теният тыгаяк сӱрет. Шыжым сай лектыш лиеш, докан. Кызыт тыгак лектышым минерал ӱяҥдыш дене подкормитленыт.

– ™яҥдышым ме тений икияшым ӱдымаштат кучылтына, – ойла Герман Афанасьевич. – ™яҥдыш деч посна, ӱдышаш шурным чылажымат чер да эҥгекым кондышо копшаҥге-влак деч протравитлыме. Сандене ончыкыжым сай лектышым налаш шонена. Шыжым чыла пасум кылмаш курал кодышна. Вет шошым куралмын пайдаже уке да тидым ышташат огыт шӱдӧ, тений гын, поснак тидым ыштыман огыл. шкеат ужыда, могай кукшо игече шога.

Биктимиров кресаньык-фермер озанлыкын мланде пашаеҥже-влак кызыт лым лийде тыршат, кӱчык жапыште шошо агам пытараш шонат. Тыгодым кугу тӱткышым ӱдымӧ качествылан ойырат да чыла агротехнически йодмашым шуктат.

Ю. Шамсутдинов.