Калтаса ужара
+17 °С
Пылан
Все новости
Новости
13 Ага 2020, 21:15

Калтаса районышто «Ветеранын пӧртшӧ ончылно парад» патриотический акций эртен

9 майыште Кугу Ачамланде сарын ветеранже-влакым муро да куштымаш дене саламленыт. Самоизоляций условийыште пенсионер-влак мӧҥгыштышт кодышт манын, нунын пӧрт ончылнышт изи концертым ончыктеныт. Ты пайремысе, патриотический акций «Ветеранын пӧртшӧ ончылно парад» манылтын.

9 майыште Кугу Ачамланде сарын ветеранже-влакым муро да куштымаш дене саламленыт. Самоизоляций условийыште пенсионер-влак мӧҥгыштышт кодышт манын, нунын пӧрт ончылнышт изи концертым ончыктеныт. Ты пайремысе, патриотический акций «Ветеранын пӧртшӧ ончылно парад» манылтын.
Шке орден ден медальыштым чиен ветеран-сеҥыше-влак балконыш лектын, виш тӧрза гыч, пӧрт ончыко лектын концертым онченыт. Кажне ийын нуно тиде Кугу кечым чон вургыжын вучат. Нуно фронтысо корным, пырля служитлыме йолташыже-влакым шарналтат да нигунамат элыште сар ынже лий манын тыланат.
Краснохолмский селаште райрӱдӧ Культура пӧртын пашаеҥже-влак концерт программе дене кум ветеран деке лектыныт. Ик эн ончыч саламлымашым Фархетдинов Мархаметдин Фархетдинович налын. Ветеран Кугу Ачамланде сарын II-шо степенян орден, Кугу Ачамланде сарыште участвоватлымылан, Георгий Жуковын медальже-влак дене палемдалтын.
Варажым концерт Фрунзе уремын ик оралтыштыже эртыш. Тыште Исекеев Алексей Семенович ила. Тудо БР-ын сулло туныктышыжо, Россий просвещенийын отличникше, марий литературын классикше Яныш Ялкайн лӱмеш премийын лауреатше улеш, БАССР Верховный Советын грамотыжо дене кок гана палемдалтын.
Горький уремыштат артист-влакым вученыт. Зайдуллин Гарифулла Зайдуллович Мӱндыр Эрвелыште служитлен. Япон милитарист-влак да Йӱдвел Корей ваштареш кредалын. Сеҥымашым Владивостокышто вашлийын.
Умбакыже райрӱдӧ Культура пӧртын агитбригадыже Токран ялыш толын. Ты ялыштат Кугу Ачамланде сарын ик ветеранже ила. Тений мартыште Арсланов Ахматнур Хаматнуровичлан 100 ий темын. Тудо ӱмыржӧ мучко артиллерист лийын. Эн кӱкшӧ награде тудлан – «За победу над Японией» медаль.
Калтаса селасе рӱдыштӧ артист-влак кок адресыш лектыныт. Мударис Гатиятуллинович Мисьбахетдинов рядовой лийын служитлен. Мударис Гатиятуллинович «За победу над Германией», «50 лет Советской армии и флота» медальже-влак улыт.
Мустафин Гайнигилим Талипович 1944 ий октябрьыште шочмо элым аралаш каен. «За победу над Германией», «30 лет советской армии и флота» медаль-влак дене палемдалтын.
Концерт программе кажныжлан келшен. Кӧ дыр чыла тидым тӧрза гыч ончен, кӧ дыр уремыш лектын совым кырен. Шке ачашт, кочашт-влакын портретышт дене лекше-влакат лийыныт. Нуно шке шочшышт дене кугешнат. Ветеран-влак ончылно Кристина Русиева, Ирина Карасева да Виктор Ванюшкин выступатленыт.