Латикымше классыште тунемше-влаклан шергакан пӧлек

Районышто «Пӧртыштӧ тунемаш полшыза» акций тӱҥалын, тудым Башкортостан Республике наука да образований министерстве, цифровой вияҥмаш министерстве да «Икоян Россий» партий исполком пырля организоватленыт. Ты акций почеш Калтаса районышто латикымше классыште кум тунемше шергакан пӧлекым – компьютер планшетым – налыныт.

Наталья Федоровна Сухова – шуко икшыван ава, ныл икшывым ончен кушта. Вениамин 2 №-ан Краснохолмский кыдалаш школышто 4-ше классыште тунемеш, Лев – шымше, Елизавета – индешымше, а Глория тений латик классым тунем лектеш. Еш кызыт неле ситуацийыш логалын. Пандемий жапыште чыла тунемше дистанционно тунемаш тӱҥалын. Кузе ме ужына, Суховмыт ешлан тунемаш интернет дене ик технике гына огыл кӱлеш.

– Пӧртыштӧ мемнан компьютерна уке, – шӱлыкан ойла Наталья Сухова. – Чаманен каласаш логалеш, пелашемат илыш дене чеверласен. Илыме верыш илаш пуренна гына. Шкеже «Аксарлак» кевытыште пашам ыштем. Пашадар илен лекташ кая.

Наталья Сухован икшывыже-влак дистанционно телефон гоч тунемыт. Техникым налаш йӧн уке. А ты арнян Натальян кугурак ӱдыржӧ у компьютер планшетым налын. Вӱргечын дистанционно тунемаш техникым «Икоян Россий» партийын верысе пӧлкажын исполнительный секретарьже Зоя Валеевна Максимова да образований пӧлка вуйлатыше Эльвира Рашитовна Гарипова кучыктеныт.

Тылеч посна районышто эше кок тунемше планшетым налын – Келтей кыдалаш школ гыч Изимариев Даниил да 2 №–ан Краснохолмский кыдалаш школ гыч Валиуллин Геннадий. Нуно чыланат шагал доходан ешла гыч улыт.

– Дистанционно тунеммашым умбакыже шуйыза манын, ме тыланда тугок планшетым кучыктена, – каласен образований пӧлка вуйлатыше Эльвира Гарипова. – Тыланда сай тунеммашым, ЕГЭ-ым сайын сдаватлаш да ВУЗ-ыш тунемаш пураш тыланена.

Тунемше-влак тыгай пӧлеклан моткоч куаненыт. Глория тыгай пӧлекым вученат огыл. Аважым мутшо почеш, нунылан толмышт деч 15 минут ончыч гына увертареныт.

– Ме тыгай полышым вученат огынал, – ойла Глориян аваже. – Чынжым каласаш гын, мыланна кугыжаныш велым. Нимогай полыш лийын огыл. нимогай льгота дене огыда эрте манын эре ойленыт. Шкетын икшыве-влакым йол ӱмбаке шогалташ неле. Ме тыгай шергакан пӧлеклан моткоч куаненна да школ администрацийлан да образований пӧлкалан кугу таум ойлена. Тыгак «Икоян Россий» партийлан тау.

Эше тидым каласаш кӱлеш, Глория Сухова «4» ден «5»-лан гына тунемаш, БГУ-ын Бирскысе филиалышкыже тунемаш пураш шона. ЕГЭ-ым сдаватлаш руш йылме да математике деч посна историй ден обществознанийым ойырен налын. Тыгай пӧлек дене тудо сай тунемаш веле огыл, тыгак экзаменымат сай сдатлен кертеш.