Калтаса селаште Кугу Отечественный сарын участникше-влаклан лӱмдымӧ шарнымаш стелле ден Совет Ушемын Геройжо-влакын бюстышт воктеке венок-влакым пыштеныт

Венок-влакым пыштымаште райрӱдыштӧ улшо чыла предприятий, организаций, учреждений-влакын пашаче коллективышт участвоватленыт. Коронавирус пандемийлан кӧра чыла тиде ойыртемалтше режимыште эртен. Кок-кум еҥ гыч шогышо пашаче коллектив-влак Чап Мемориал деке 10 минут эртен толыныт да венокым пыштеныт. Венокым пыштыме графикым тиддеч ончыч ялсовет администраций чыла организацийлашке колтен лийын. Венокым пыштыме годымат чыланат маске режимым шуктен толыныт да тудо ныл шагат наре шуйнен. Эн ончыч, кандаш шагат эрдене Кугу Отечественный сарын участникше-влакым район администраций вуйлатыше Садыров Юрий Миназарипович ден районысо ветеран-влак ушемын вуйлатышыже Ильчигулов Евгений Иликбаевич шарналтеныт. Вара эстафетым Калтаса ялсовет администраций, райрӱдысӧ школ коллектив-влак, полиций, эмлымвер, коммуналь службо, культура учреждений, связист, энергетик да моло-влакат налыныт.

Сарыште колышо да сеҥымаш дене пӧртылшӧ салтак-влакым шарналташ тыгак мер организаций, политический партий-влакын районысо пӧлкажын членже-влакат толыныт. Тыгак райрӱдӧ калыкат миен пеледышым пыштен.

Обелиск деке илалше пӧръеҥ тольо, юмоҥа ончылно семын ыреслыш да вуйжым савыш. Тудо Совет Ушем Геройын кажне бюстшо ончылно тыге ыштыш. – Мохов Павел Павлович, – пелештыш тудо. – Мыйын ачам, Павел Васильевич Мохов, Надеждин ялыште шочын, сарыште 1941 гыч 1945 ий марте лийын, вара эше япон-влак ваштареш кредалын. Мый пенсийыште улам гынат, таксист лийын ыштем. Воктеч эртен кайышыла, пурен лекде ышым чыте. Мыланна тыныс илышым кондышо-влак ончылно вуем савем.

Российыште чыла ешыште кӧм-гынат сарыш ужатеныт. Кажне ешыште шке геройышт уло, кудышт дене нуно кугешнат, нуным ӱмыр мучко шарнен илат.

Ю. Шамсутдинов.