Маске дене кошташ тӱҥалына

Башкирийын Кугыжаныш Погын – Курултайже маске режимым пудыртымылан штрафым пеҥгыдемден: еҥ-влаклан – 1-3 тӱжем теҥге, кокымшо гана пудыртет гын – 3-5 тӱжем теҥге. Вуйлатыше-влак 5-15 тӱжем теҥге штрафым тӱлаш тӱҥалыт (кокымшо гана пудыртат гын, 15-30 тӱжем теҥге), организаций ден предприятий-влаклан – 50-100 тӱжем теҥге штрафым тӱлыкташ ыштат (кокымшо гана 100-200 тӱжем теҥге).

Документым республике вуйлатыше деке подписыш пуэныт. 12 майыште Башкирий самоизоляций режимым пушкыдемден, туге гынат маскым чийыман. А общественный верлаште маске да перчатке деч посна лийман огыл.

«Эл ден республике эркын самоизоляций режим гыч лектеш. Сандене еҥ-влак общественный верлаште, пашаче коллективлаште шукемыт. Сандене профилактикым шуктен толман. Но чаманаш веле кодеш, чыланат тиде режимым огыт шукто. Сай илышлан кӧра огыл ме тыгай мера-влакым приниматлена. Вет мыланна айдемын тазалыкше эн шерге», – каласен башкир парламентын спикерже Константин Толкачев.

«Башинформ» ИА.