Калегин ялсоветын куд ял гыч пӧръеҥже-влак кыр спорт дене таҥасымашым эртареныт

Калегин ялсоветын куд ял гыч пӧръеҥже-влак – армийыште служитлен толшыжат, армий радамыш каяш ямдылалтшыжат – Кугу Сеҥымашлан 75 ий темме лӱмеш кыр спорт дене таҥасымашым эртареныт.

Коронавирус шке вашталтышыжым пуртен, сандене таҥасымашым 7 гыч 11 май марте эртарыме. Участник-влак 16 кг кырым черет почеш шола да пурла кид дене нӧлтеныт. 55 кг марте нелытан-влак коклаште Петров Евгений Георгиевич сеҥен, тудо 98 гана нӧлталын, кокымшо Николаев Роман Вячеславович лийын. Нуно коктынат Акиней ял гыч улыт. Кумшо верым Калегин ял гыч Васингин Александр Юрьевич налын. Тудо кырым 59 гана нӧлталын.

65 кг марте нелытан-влак коклаште эн шуко участник – 10 еҥ – лийын. Нунын кокла гыч эн тале Валикаев Василий Артурович лийын. Калегин ял гыч 17 ияш самырык рвезе кырым 210 гана нӧлталын. Кокымшо Кушна ял гыч Николаев Лев Алексеевич, 125 гана нӧлталын, кумшо – Сылвий ял гыч Юкчубаев Руслан Игоревич – 111 гана. Тыгак тиде нелыт категорийыште Калегин ял гыч Николаев Даниэль Сергеевичым палемдыме шуэш. Тудо 101 гана нӧлталын.

75 кг марте нелытан-влак коклаште Калегин ял гыч Иванов Сергей Михайлович икымше лийын (280 гана), тиде мемнан ялсовет территорийыште абсолютный результат. Кокымшо Марий Мераҥ ял гыч Митрофанов Алик Константинович лийын (139 гана), кумшо верыште Калегин ял гыч Шапошников Егор Александрович (130 гана). Тыгак Акиней ял гыч Николаев Денис Вячеславовичым палемдыме шуэш. Тудо кырым 115 гана нӧлталын.

75 кг деч нелырак нелытан-влак коклаште Калегин ял Армянинов Евгений Юрьевич лийын. Тудо кырым 165 гана нӧлталын. Кокымшо – Морко ял гыч Шамтиев Эдуард Андреевич – 115 гана, кумшо – Сылвий ял гыч Алексеев Олег Сергеевич – 60 гана.

Таҥасымаште чылаже 28 спортсмен участвоватлен. Нунын кокла гыч эн самырык Марий Мераҥ школын 9-ше классыште тунемшыже Пономарев Вадим Алексеевич лийын. Акиней ял гыч 15 ияш рвезе шке нелыт категорийыште 50 гана кырым нӧлталын. А эн кугу участник, 74 ияш спортсмен да тиде строкалан авторжо, 75 кг нелытан-влак коклаште визымше верым налын, кырым 105 гана нӧлталын.

Таҥасымашын чыла участниклан коронавирус ваштареш пеҥгыде иммунитетым, тазалыкым да ончыкыжымат спортышто кӱкшӧ результатлашке шуын толаш тыланен кодам.

В. Валикаев.