Калтаса район гыч 203 самырык еҥым призывной комиссийыш ӱжмӧ лийын

Ты арнян районысо призывной комиссий Россий армий да флотыш призывник-влакым ойырен налаш тӱҥалын. 203 еҥ кум кече жапыште райрӱдӧ эмлымверыште медицина текшырымашым эртен да вара призывной комиссий ончылно лийын.

Мемнан район гыч 48 самырык еҥым тений шошым воинский частьлашке срочный службым эрташ колташ палемдалтеш.

– Коронавируслан кӧра мыланна призывник-влакым ойырен налме сомылым кум гана кусараш перныш, – ойла Янаул ола, Янаул да Калтаса районлаште военный комиссариатын военный службыш граждан-влакым призыватлыме да ямдылыме шотышто пӧлка вуйлатыше Д.Х. Шайдуллин. – Ончыч призывной комиссий мемнан апрель тӱҥалтыште пашам ыштыш, а тений май покшелне. Тугеже рвезе-влакым армийыш колтымо жапат шеҥгел числалашке кодын. 29 майыште рвезе-влакым армийыш колташ палемдалтеш. Призыв шотышто моло вашталтыш, жап деч посна, уке. Колледжыште да вузышто тунемме жаплан, медицинский показаний-влак шотышто гына служба деч отсрочко пуалтеш. Тыгак судитлалтше рвезе-влакым армийыш огына нал. Армийыште служитлымаш мемнан обществыште пӧръеҥ-влакын почетан обязанностьышт лийын да кодеш. Сандене шуко призывник кугу тыланымаш дене служитлаш кая. Варажым контрактный служба дене кодшо-влакат ятыр улыт.

Даниф Хамидович тыгак палемден, Калтаса районышто призыв эре сайын эрта, Нигӧ ок шыл, нигӧ ок курж. Призывник-влакым кычалаш полиций пашаеҥ-влакым ушымо случай-влак эше лийын огытыл. Калтаса кундем гыч рвезе-влак армийыште чын служитлат, шке порысыштым чап дене шуктат, моло-влакланат пример лийын кодыт. Тидым воинский частьлаште налме грамота, салтакын ача-авашт лӱмеш командований деч таум каласыман серыш-влак пеҥгыдемдат.

Ю. Шамсутдинов.