Мемнан календарьна

Леве мардеж пуалеш. Вучыдымо семынак толын, лыжга йӱр мландым мушкын эрта да игече уэш ояра.

Мланде ырен шумо почешак икияш пасушто паша муро тарваныш. Куралме почеш шемем вочшо, вӱдыжгє мландыш туто пырче ӱдалте, а шыжым ӱден кодымо кокияш озым пасу сывын дене леведалтме гай ужарген возо.

Шукерте огыл гына чара шогышо укшеран пушеҥге-влак самырык ужар лышташыштым шаралтеныт. Садланак шкештак рвезештме гай койыт. Пӱтынь чодыра кеҥеж вургемым чиен шогалын. Тыште ынде утларакше куку-влакын йӱкышт йоҥга, моло кайык пыжашыште муным ырыктен шинчат да вашке игым луктыт.

Лум шулымо почешак телымсе вынемышт гыч лекше маска-влак, изи игыштым вӱдалтен, чодыра мучко кочкышым кычал коштыт. Шордо-влакынат презышт уло. Мераҥ -влак икымше гана игым ыштеныт. Сузо, кӱдыр, мызе да лудо-влак эше пыжашыштышт, муно ӱмбалне, пӱктен шинчат.

Чыла янлык ден кайыквусо вараже шкеныштын самырык тукымыштым пич верлаште шылтен ашнен, ончен куштат.

Ерла ден эҥерла воктене колызо-влак лектыныт. А нунын йырысе арама лоҥгаште, айдеме-влакын моктен пытарыме сар шӱшпык ден олык кайык, икте-весыштым сеҥ аш тӧчен, сылне семыштым шергылтарат. Шўшпык-влак эрдене, кечывалым, кастене да йӱдымат мурат, пуйто кочкашат огыт ярсе.

Мурен чарныдыме кайык-влакын йӱкышкышт, вӱд ырен шумеке, ужава-влакын тале хорышт ушна. Шымлен колыштмо годым ужава-влакын мурыштыштат шӱмеш логалше сем раш шижылтеш.

Майыште уло пӱртӱс ылыжеш: чонанжат, чондымыжат шӱла, мура. Май вашеш вашталташ тӱҥалше пӱртӱсын тӱсшє тылзе мучашеш ялт ужарга. Вет тудын кеҥежымсе тӱҥ тӱсшӧ - ужарге.