Самырык суртозалан

Роза – сад-пакча кугыжа

Роза пеледыш эре кугешненыт да тудым йӧратымаш символлан шотленыт. Пеледышым куштенат моштыман.

Вӱдым арнялан ик гана, кеҥеж шокшо гын, чӱчкыдынрак шавыман. Ик вондылан ик ведра леве вӱд кӱлеш. Вӱдым вожыш гына шавыман. Лышташыш логалташ огеш йӧрӧ. Кужу жап пеледышыш вӱдым опташ йӧн уке гын, тудым терыс дене левед кодыман. Вӱд ситыдымылан кӧра пеледыш бутон лийын огеш шу. Уто вӱдым оптымо гын, юж вож деке миен огеш шу. Садлан пеледыш лышташ нарынчалген кертеш.

Чер деч эмлена.

«Мучнистая роса» чер годым лышташыште ош тамга-влак лектыт. Ик литр вӱдыш 40 грамм содым варен, арнялан 2-3 гана пеледышыш шыжыктыман.

Тля витара. Ик ведра вӱдым шолаш пуртыман, тушко изи ужаш озанлык шовыным, арымшудым ешарен, 15 минут шолтыман. Вартышым йӱкшыктарен, пеледышыш шыжыктыман. Арня гыч уэш шаваш ида мондо.