Аля еҥгай

Ошкыл колта йол йымалсе мландын вийжым шижын, кап-кылжым виктарен, пуйто ныжыл марий сем почеш чӱчкен эрта.

Тиде-мемнан еҥгана, кована Алевтина Исаевна Шаймарданова. Шочын-кушкын тудо Пиштан эҥер вӱд воктене верланыше Тошто Оръямучаш ялеш. Школышто тунемын, изинекак фермыште дояркылан ышташ тӱҥалын, пенсийыш лекмешкыже тиде сомылымак шуктен шоген. Шуко гана Обком грамота дене палемдалтын.

Марлан лектын, марий йӱла почеш сӱаным тарватеныт. Ӱдырым имнеш шынден, волтеныт торашкат огыл, Изилоҥгыштак, ӱлыл мучашкыла Шамагул эргыже Алексейлан. Нунын вич икшывышт шочын: кок эрге: Владик, Юрий; да кум ӱдыр.

Галина Амзибашыште еш пиалым муын, Нина ден Лидия Нефтекамск олаште илат. Нуно шке аваштлан илыш вийым нӧлтен, шуен шогат. Нина шешкыж дене коктын сурт-пакчам, садым кучат, уныкашт-влаклан куанен илат.

Аля еҥгайна, ковайна тукым еш да ял калык коклаште кугырак-влакым жаплен, изиракшым пагален илымаш кумылым шыҥдарен шога, марий йӱлам переген толеш да ончыкылык тукымлан умылтараш тырша.

Л. Казакова.