Зина акай

Мутем Зинаида Семеновна Якупова (ӱдыр фамилийже Иманова) нерген ярымлынем. Шочынжо Тошто Оръямучашеш. Ачаже, Семион Иманов, Кугу сарын ветеранже, уло яллан пӧрт кӧргӧ ӱзгар кучышым ыштыше, аваже, Нямуш Иманова, шуко чытыше марий ӱдырамаш. Нунын ныл икшывышт лийын: кум ӱдыр да ик эрге. Зина акай (манам мый, автор) – межнеч ӱдыр, изиракышт. Суртышт мемнан пӧртлан йожекрак. Илыме вер, кудывече, сад-пакча-модыш пӧрт гай, чыла арун, шот дене ыштыме, шинчалан куанле, мотор да ямле. Эсогыл вӱтасе вольыкынат кажныжын шке верже уло, яндар юж да волгыдо. Нунын суртышто, чынжымак, лывырге, уста кидан, волгыдо кумылан, уста оза тыршен. Тугак и лектеш – икшыве-влакат ава-ачам пагален, суртым переген, пошкудо-влак дене кутырен моштен, келшен илат. Зина акай Лиза акамын (шке манмыжла) ик эн сай йолташ ӱдыржӧ. Кырпысе кандашияш школым тунем пытарымекыже, Уфаште, Ижевскыште тунемын, пашам ыштен. Тудо олаште илен гынат, чӱчкыдын ялыш толеден. Ойлен колтымыжо, койышыжо чонеш вигак кышам кода. Рушла пелешта гын, руш еҥ деч от ойыро, татарлат сайын ойым пидын кертеш.

Вургемым шкаланже веле огыл, илыш йодмо почеш наледен моштен, тугак ака-шӱжар, йолташыже-влакланат лапке чиемым кондеден. Школышто кучылташ келшыше тӱрлӧ методический книгамат нумалын. (А корно мемнан ялыш тунамат шыма да вияш лийын огыл, кызытат лектын каен колташ неле). Зина акай мыланна сӱретлаш тӱрлӧ тӱсан чиям, карандашым, ручкам налын. Мулине шӱртыжым ужын, мемнан урем ӱдыр-влак мочол куаненыт да шуко тӱрлӧ шовычым, солыкым, пырдыжеш вераҥдыме мотор пеледышан вазым тӱрленыт. Ушым, чон-шижмашым пыштен сӧрастарыме марий тувыр, ончыласакышым ямдылаш мыняр жап да чытыш кӱлын! Вет пырляште чылажат куштылгын эртен, сеҥеныт. Вара алын-гӱлын койшо чиемышт дене калыкым куандареныт: марла спектакльым шынденыт, муро, куштымаш лийын, почеламут, ойлымаш-влакым йоҥгалтареныт. Кеҥежым колхоз пашаште шуаралтыныт.

Зина акай ялысе ӱдыр-рвезе-влаклан эре полшен шоген, ялысе илышым сылнештараш алал кумылын тыршен.

Кызыт Зинаида Семеновна Нефтекамскыште ила. Пакча-сад пашам шуктен шога. Кок эргым, Володя ден Виталийым, ончен куштен, уныкаже-влаклан куанен ила.

Л. Казакова