Красный Холм гыч Татьяна Вечтомова села калыклан полшаш эре ямде улеш

Староста нерген селаште чыланат палат. Лач тудын деке шке йодышыж дене калык толеш. Тудо поро шӱм-чонан гына огыл, тыгак кугу чытымашан, калыкым умылен моштышан лийшаш. Кажныжым колышташ, кажныжлан полшаш кӱлеш да шке вачӱмбаке мер пашам пыштыман. Чыла тидым Татьяна Вечтомова ышта.

13 июньышто села верч тыршыше еҥлан поснак ойыртемалтше кече. Тиде кечын шкенжын юбилейжым Красный Холм селан старостаже Татьяна Айбашевна Вечтомова палемда. Лач тудо села калыкын интересшым, йодышыжым решатла, самоуправлений орган дене кылым куча, тӱзатыме пашам организоватла.

Шке ийготшым шотыш налде Татьяна Айбашевна шке пашажым сайын шуктен шога. Тудо тыгак самырык-влак коклаште патриотический воспитаний шотышто кугу пашам намия. Тудын инициативыже почеш, Красный Холмышто Кугу Отечественный сарыште лийше салтак-влаклан обелискым почмо. Тудым ППМИ-2019 почеш чоҥымо.

Татьяна Айбашевна вуйын шогышо да сай кумылан айдеме, чыла мер пашаште ончылно улеш да кажныштыже участвоватла. Тиде – субботник, шӱгарлам эрыктымаш, тӱрлӧ акций-влак: «Зеленая Башкирия», «Чистый пруд».

Татьяна Айбашевнам ик гана веле огыл Тауштыме серыш ден Чап грамота дене палемденыт.

Тыгак Татьяна Айбашевна сай да тыршыше ава да кова улеш, тудо кугу озанлыкым куча, сад-пакчаштыже тӱрлӧ пакчасаска ден пеледыш-влак кушкыт.

Краснохолмский ялсовет администраций да Красный Холм села калык лӱм дене Татьяна Айбашевнам 65 ияш юбилейже дене саламла да тудлан пеҥгыде тазалыкым, пиалым, пашаштыже сеҥымашым да чыла сайым гына тыланен кодеш.

А. Армянинова.