Пудий-влак озаланат

Башкирийыште пудий пурылмо деч вара медицине полышым йодын толшо еҥ-влак шукем толыт. Сезон тӱҥалтыш гыч чылаже 6251 еҥ лийын, тышеч 1518 йоча. Кодшийсе дене таҥастараш гын, ты жапыштак 5496 еҥ лийын. Ситуацийым Башкортостан Республикысе Роспотребнадзор Управлений текшырымаште куча манын, ведомствын пресс-службыжо увертара.

Кызыт республикыште акарицидный обработкым ыштыме паша умбакыже мия, тиде пашам тергенак шогат. 9 июньлан пудий ваштареш 3 тӱжем гектар площадьым обрабатыватленыт, Уфаште гын – 900 га. Чылаже республике мучко 4 тӱжем гектарым обрабатыватлаш шонат.

Кеҥежымсе йоча каныме лагерь-влакым почмо деч ончыч нунын территорийыштым тыгак обрабатыватлаш тӱҥалыт.

Тиддеч посна Роспотребнадзор управлений калык дене профилактике шотышто умыландарымаш пашам намия. Тыште эн тӱҥжӧ – келшыше вургемым чияш да тудым акарицидный средстве дене обрабатыватлаш мондыман огыл.

«Башинформ» ИА