Калтаса районышто «Шарнымаш сорта» патриотический акций эртен

«22 июньышто 4 шагат эрдене сар тӱҥалме нерген увертареныт». Теҥгече Российыште Кугу Ачамланде сар тӱҥалме шӱлыкан кечым палемденыт.

Ты шучко сар деч вара 79 ий эртен. Тукым вашталт толеш, мемнан деч пагалыме ветеран-влак каят, туге гынат шарнымаш 1941-ше шучко да шӱлыкан ийыште шочмо-кушмо элнам аралыше-влаклан угыч да угыч таум ойлена. Элнан тӱрлӧ луклаштыже фронтыш кайыше да пӧртылшӧ, сарыште кредалше да Сеҥымашым кондышо салтак-влакым шарналтеныт.

Мемнан районышто 22 июнь эрдене «Шарнымаш сорта» акций тӱҥалын, тудым самырык-влак дене пашам намийыше комитет да «Центр» клуб организоватленыт. Тудо офлайн семын эртен. Тиде ӧрдыж, интернет гоч огыл, а верлаште да еҥ-влакын ты акцийыш ушнымышт дене эртен.

4 шагат эрдене самырык-влак тӱшка вуйлатыше Э.Б. Мурсакаев дене Калтаса селасе Чап мемориал воктеке толыныт. Нуно мемориал пырдыжыш, Совет Ушемын Геройжо-влакын памятникышт воктеке сортам шынденыт. Свеча гыч «1941» датым ыштеныт. Ик жап шып шоген сарыште колышо чыла салтаклан пагалымашым ончыктеныт.

С. Аркадьева.