Медосмотр

Школышто 1 сентябрьлан у тунемме ий тӱҥалашлан пагыт шуэш. Учитель-влаклан август мучаште медосмотрым эртарат. Кеч райрӱдыштӧ, кеч олаште тыгай комиссийым эртыман. Эн чот тӱҥалтыш класслам туныктышо-влакым текшырат: кӧргӧ-тырлыкым эскерат, тазалыкым ончат.

Вот теве кунам врач-влак туныктышо-влакым толаштарен налыт. Кок кече гына тӱрлӧ анализым сдаватлыман. А участковый терапевтын эше ялла гыч толшо пациентше-влакат улыт, тыге кужу гына черет погына. Изиш каҥашымеке, туныктышо-влакым икте гоч колташ кӧнат: ик еҥ ял гыч толшо эрта, весе школ гыч. Тыге шагат коклаште приемыш кум-ныл туныктышо логал кертеш.

– Тачылан сита, – манешат саде илалшырак терапевт ӱдырамаш да обедыш ошкылеш. Шкенжын йочашт-влакымат мӧҥгыштӧ ончыман. Туныктышо-влак терапевтым вучат-вучатат, пӧртыл каят.

Эрлашыжым адак толыт. Сӱрет теҥгечсе деч ок ойыртемалт. Ик шагат коклаште ик туныктышо веле врач деч подписьым налын керте. Весат пура ынде приемыш.

– Молан «ухогорлоносын» подписьше уке? – Но мый тушто лийынам, очыни, тамгажым пышташ монден, печатьше уло вет. – Никаких «но»! – чак ыш кычкырал врач, – ала те соҥыра улыдат, садлан йоча-шамычлан кокытаным шындеда. Куш пура вара туныктышет? Ошкылеш «ухогорлонос» кабинетыш подпись пыштыкташ, адак черетым налеш. Арня коклаште медкомиссийым эртымеке, «Тазалыкым аралыме» шотышто 100 теҥгем тӱлен, ик часлык лекцийым колыштман. Тунам гына медосмотрым эртыме нерген подписьым шындат. Вес ий мартен чоным луштарат.

М. Данилов.