ЗАГС-те у ешым чумырымо годым ынде ача ден ават лийын кертыт

Тольык нуно 65 ий деч кугырак лийшаш огытыл.

Башкирийыште ЗАГС-ште мужыр-влакым регистрироватлымашке ынде ача ден ават миен кертыт. Ава ден ачалан 65 ий темын гын, нуным пайремышке огыт пурто. Тыгак пайрем мероприятийыште фотограф ден видеографат лийын кертыт. Тидын нерген БР-се юстиций паша шотышто кугыжаныш комитетыште каласеныт.

У правил 16 июнь гыч илышыш шыҥдаралтын. У еш шочмым регистрироватлыме годым социальный дистанцийым шотыш налын, оръеҥ ден каче, оръеҥ ден качын ачашт ден авашт (65 ий деч кугырак лийшаш огытыл), фотограф ден видеограф (кок еҥ деч шукырак лийшаш огыл) ЗАГС пӧлка пашаеҥ лийын кертыт.

Ушештарена, коронавирус пандемий тӱҥалме годсек, ЗАГС-те оръеҥ ден каче веле лийын кертыныт. Тыге, апрельыште, самоизоляций режимыште 137 у еш шочын. Шуко мужыр шонен пыштыме сӱан кечыштым шеҥгекырак шӱкалыныт.

Юстиций кугыжаныш комитетыште палемдат, икшыве шочмо, ешым чумырымо, икшывым ончаш налме шотышто свидетельстве-влакым кугыжаныш да муниципаль услугын Единый порталже гоч йодмашым пуэн налаш лиеш. Пӱсӧ йодыш уке гын, ЗАГС пӧлкаш мияш огыт кӱштӧ. Чыла йодышым электрон почтыш колташ але телефон дене йыҥгырташ лиеш.