22 июньышто Калтаса селаште Кугу Отечественный сарыште тушман ваштареш кредалше да тылыште тыршыше-влакым шарналтеныт

79 ий ожно, 1941 ий 22 июньышто, Российын историйыштыже эн шучко, шуко вӱрым йоктарыше – Кугу Отечественный сар – тӱҥалын. Тудо миллион дене калыкын илышыжым лугыч ыштен.

22 июньышто, Шарнымаш да ойго кечын, Калтаса райрӱдыштӧ Сеҥымаш мемориал воктеке венок ден пеледыш-влакым пыштеныт.

Пайрем мероприятий митинг да ончаш толшо калык деч посна эртен. Тыште Калтаса селасе предприятий ден организацийлаште тыршыше пашаеҥ-влак, кок Калтаса школ участвоватленыт. Тыгак тышке чыла тыланыше, кӧ Кугу Отечественный сарыште колышо-влакым шарнен ила, ушнен кертын, но тыгодым чыла кӱлеш мерым шуктыман лийын. Кӧн, мемориал деке пурымаште пеледышыже лийын огыл, нунылан «Центр» клубын пашаеҥже-влак изирак аршашым ямдыленыт ыле.

Тышке погынышо калык элнан эрыкше верч кредалше да сарыште колышо салтак-влакым ик жап шып шоген шарналтен.

Э. Мурсакаева.