Шоръялыште корно олмыкталтеш

Шоръялыште илыше калыклан куан – корным олмыктат. Тидым нуно икмыняр ий вученыт.

Шошым да шыжым корныдымо жап годым але йӱр йӱрмӧ деч вара тӱҥ урем дене кайыме годым тыгай сӱретым ужаш лийын:рӱдӧ уремыште кок велымат машина-влак шогат. Шочмо ялыш толшо-влак, тыгак ты ял гыч еҥ-влак шке пӧртышт деке машина дене кудалын огыт керт. Амал икте – корно укелык, лавыра. Икмыняр ий ончыч ялыште корным олмыктымо ыле. Туге гынат, кузе ойла ял калык, ала шаргӱ ошман лийын, ала вер-шӧр гый. Арамлан огыл дыр яллан Шоръял лӱмым пуэныт. Татар йылме гыч «саз» мутым кусараш гын, тудо куп але вӱдыжгым ончыкта.

Туге гынат таче ме куанле увер нерген каласен кертына. Эртыше арнян ялыште икмыняр уремым олмыкташ тӱҥалыныт. Лазарев, Молодежный, Заречный урем-влак да Комсомольский переулкышто илыше еҥ-влак ындыжым йӱран игечыштат шке автомашинашт дене пӧрт деке каен кертыт.

Олмыктымо верыш толын шумеке, ме автогрейдерын машинистшым Ильшат Тимирхановым вашлийна, тудо ыштыме паша нерген ойлыш:

– Ме корным автогрейдер дене профилироватлена, вара гравийым кок слой дене шарена, тудым тӧрлена да каток дене лаптыртена.

Ялыште корным олмыктымаште подрядчик – Краснохолмский села гыч «СтройТехСервис» ООО. Тудым Фанис Фанилович Гайнулин вуйлата. Ф. Гайнулинын мутшо почеш, пашаште ныл самосвал, ик автогрейдер, ик каток да Кугу Качак карьерыште ошма-гравий смесьым оптымаште ик экскаватор пашам ышта. Технике да пашаеҥ-влак кажне кечын тыршат.

Шоръялыште илыше калык тидлан моткоч куанен.

– Тыште машина дене кайыме нерген ойлыманат огыл, – каласыш Геннадий Сергеев, тудо Лазарев уремыште ила. – Корно – тиде мемнан моткоч пӱсӧ йодышна. Ме ты сомыллан моткоч куаненна, туге гынат ты корно кужу жаплан да пеҥгыде лиеш гын, манын ойгырена.

Мут толмашеш, ончыч ты урем дене эртен каяш лийын огыл. «СтройТехСервис» ООО вуйлатышын мутшо почеш, ял корным калык шке тӱз кучышаш улеш. Кугу грузан машина дене кудалышташ огыт тӱҥал гын, шаргӱ лавыра дене огеш йӧрналт. Вет чыла пашам тӱҥалтыш гыч мучаш марте Технадзор текшыра. Тидын шотышто ял калык ойгырышаш огыл.

О. Айгильдина.