Илыш корным ойырен налме нерген

Калтасаште район администраций вуйлатыше 2019-2020 ийласе тунемме ийыште Всероссийский олимпиаде-влакын Региональный этапыштыже сеҥыше призер-влак дене вашлийын

Кодшо арнян районысо Культура пӧртын конференц-залыштыже, ӱстел коклаште чайым йӱын, район вуйлатыше районысо выпускнице-влак, кудышт тунемше-влакын Всероссийский олимпиадын Региональный этапыштыже сеҥеныт, вашлийын. Тыгак вашлиймаште Башкир кугыжаныш университетын Нефтекамск оласе филиалжын директоржо А.А. Фаттахов, районысо образований пӧлка вуйлатыше Э.Р. Гарипова, правовой обеспечений да кадр паша пӧлка вуйлатыше И.И. Тимиряева, самырык-влак дене пашам намийыше комитет вуйлатыше Э.Б. Мурсакаев, районысо самырык-влак Ушем вуйлатыше В.А. Думбадзе, 3 №-ан Краснохолмский КШ директорын информатике шотышто алмаштышыже Р.З. Сиразетдинов лийыныт.

Быкова Ирина 1 №-ан Калтаса кыдалаш школын выпускницыже. 9 классыште тудо руш йылме дене олимпиадыште призер лийын. 10-шо классыште – руш йылме да обществознаний дене, 11-ше классыште кум предмет дене: руш йылме, обществознаний да англичан йылме дене. 3 №-ан Краснохолмский кыдалаш школын выпускницыже Хамидуллина Виктория ден Кӧтерем КШ-ын выпускницыже Шуматбаева Ольга. Нине ӱдыр-влак тунемше-влакын обществознаний дене 10-шо да 11-ше класслаште тунемше-влак коклаште сеҥеныт. Нунын дене вашлийыныт да нуным вузлашке тунемаш пурымо правил-влак дене палдареныт.

Мероприятий жапыште район администраций вуйлатыше Юрий Садыров олимпиадын участникше-влаклан шуко поро да шокшо мутым каласен. ™дыр-влак шкеныштым интеллектуальный таҥасымаште сай велым гына ончыктеныт да республикыште эн сай-влак радамыш логалыныт манын, тудо палемден. Тыгак Инна Ивановна Тимиряева ден Эльвира Рашитовна Гариповат нунылан тауштеныт.

2020 ийыште Калтаса районышто 121 выпускник школым тунем лектын, тушеч 11 тунемше веле экзаменым сдаватлаш кӧнен огыл. «Тиде сай показатель», – ойла образований пӧлка вуйлатыше. Вашлиймаште тыгак пошкудо ола гыч уна, Азат Адифович Фаттаховат ыле. Тудо БГУ-н Нефтекамскысе филиалже нерген каласкалыш.

– Мый тындам лач республикысе вузлаште тунемаш йодам, – каласыш тудо. – Вет моло вуз-влак деч нимо денат ойыртемалтдыме вуз-влак воктенак улыт. Шарныза, ледниковый период жапыште кугу динозавр-влак огыл, а изи-влак илен лектыныт. Ме – филиал-влак, ме изи улына. Пандемий жапыште ме садак илен лектынна.

Тудо тыгак тунеммылан тӱлымӧ, бюджет вер-влак нерген калскалыш.

Моло увер деч посна тыгак олимпиадын участникше-влак районысо самырык-влак пӧлка деч шарнен кодаш пӧлекым налыныт.

Ӱдыр-влак – Ирина, Виктория да Ольга – мемнан районын ителлектуальный элитыже улыт. Конешне, тышке кугу надырым нунын туныктышыт, ача-авашт-влакат пыштеныт.

Ончылно нуным кугыжаныш экзамен да илыш корным ойырен налмаш вуча.

О. Айгильдина.