Калтаса районышто чумыр йӱклымаш эрта

25 июнь гыч Российыште, тыгак мемнан районыштат, элнан Тӱҥ законышкыжо вашталтыш-влакым пуртымо шотышто йӱклымаш тӱҥалын

25 июнь гыч 8.00 шагат гыч районышто 35 сайлымаш комиссий-влак шке омсаштым почыныт. Тиде кечын Россий Федераций Конституцийыш вашталтыш-влакым пуртымо шотышто йӱклымаш тӱҥалын.

Йӱклымашым 1 июльышто эртараш палемдыме, туге гынат те шке йӱкдам 25 июнь гычак пуэн кертыда.

Сайлымаш комиссий-влак пашам тӱҥалме кечын ме 2191 №-ан участкыште лийна. Тудо Калмаш ялысе СДК-те верланен.

Сайлымаш участкыште лӱдыкшыдымылык шотышто чыла мерымат приниматлат: йӱклаш толшо-влаклан перчаткым, медицинский маскым пуат, температурым висат, антисептик дене кидым обрабатыватлат.

Ончыч, сайлаш толшо еҥ, паспортшым участковый комиссий членлан пуэн гын, тиде гана тудо паспортшым шке почын ончыктышаш улеш.

Тений тыгак пӧртыштат йӱклаш лиеш. Участковый комиссий член-влак дене мый Сӧлеш ден Токран яллашке мийышым. Тиде яллаште тӱҥ шотышто илалше еҥ-влак илат. Нунылан тыге йӱклаш йӧнанрак.

Кова ден коча-влак сайлымаш комиссий член-влакым изиш ӧрынрак вашлийыч. Вет нунышт аралыме халатым, перчаткым, маскым чиеныт да эше чурийыштым специальный пластиковый экран дене петыреныт. Тидлан, конешне, илалше-влак ӧрыныт, но нимом ышташ ок лий, чыла мерым шотыш налаш кӱлын.

Сӧлеш ден Токран яллаште ик урем веле, сандене сайлымаш комиссий член-влакым калык шке пӧртшӧ воктене вучен шоген. А Сӧлеш ял гыч кок кова, воктен верланыше олык гыч йӱклаш манын, куржын толыныт, тушто нуно снегым погеныт улмаш.

Эн ончыч Сӧлеш ял гыч Нурлыгаянова Анзима Шайхулловна йӱклыш.

– Тау, толмыланда, – каласыш Анзима Шайхулловна. – Ынде уэш снегым погаш каяш лиеш.

Кажне еҥ, кӧ пӧртыштӧ йӱклен, бюллетень дене пакетым, йодмаш ден бланкым, маскым, перчаткым, антисептик дене салфеткым, ручкам налын.

Участковый комиссий-влакын пашашт умбакыже шуйна. А ме эше ик гана ушештарена, Конституцийыш вашталтыш-влакым пуртымо шотышто йӱклымаш 1 июль марте шуйна. Участковый комиссий-влак 8.00 гыч 20.00 шагат марте пашам ыштат.

Э. Мурсакаева.