Кӱлеш лиеш

Олыкышто я чодыраште кидетым йоҥылыш пӱчкын колтет гын, ит ойгыро, эмшудо йол йымалнак. Теве тӱрлемшудо (подорожник) коеш. Лышташыжым пӱчмӧ верыш пыштет гын, икмыняр жап гыч поремеш. Тыгак нызылгыме верыш, пормо пурылмашке пышташ кучылтыт.

Олык ден пасу тӱрлаште лочка (хлопушка) шудым чӱчкыдын вашлийыда. Тудын ош пеледышыжым саҥгашкет кунам-гынат почкалтаренат, очыни. Ты шудын вожшым шовын олмешат кучылташ лиеш. Кидет пеш чот лавырген гын, тыгак кугырӱдывондо кичке дене мушкын колташ лиеш. Шовын семын ок шоҥешталт гынат, лавырам сайын эрыкта.

Яндар южышто кеч-могай кочкышат тамлын чучеш. Кочкышыш горчицым але пурысым ешарет гын, йӧршеш вес тамым шижат. Но походыш нуным налаш кӱлешыжат уке. Шаргенчышудын (пастушья сумка) кичкыже саде пурыс гаяк.