Калтасамыт тӱҥ закон верч йӱкленыт

1 июльышто РФ Конституцийыш вашталтыш-влакым пуртымо шотышто йӱклымаш эртен

1 июльышто, Конституцийыш вашталтыш-влакым пуртымо шотышто йӱклымашын тӱҥ, финал этапше, эртен манаш лиеш.

Палемдена, районышто илыше калык тыгак шке йӱкшым 25 июль гыч пуэн кертын. Лач тиде кечын йӱклымаш тӱҥалын. 25 июньышто районышто 35 участковый сайлымаш комиссий шке омсажым почын.

1 июльышто эрдене мемнан корреспондентна-влак икмыняр сайлымаш комиссийыш миеныт да нунын пашаштым текшыреныт. Но ончыч ме район ТИК-ыш ончална.

Кузе мыланна районысо территориаль сайлымаш комиссийыште (ТИК) каласышт 25 гыч 30 июнь марте район мучко 70 процент еҥ йӱклен лийын. Тиде участкышкат миен шке йӱкыштым пуэныт, комиссий член-влак мӧҥгышкыштат коштыныт.

10 шагатлан 2214 №-ан участкыште, тудо Краснохолмский селасе 1 №-ан школышто верланен, чыла сайлыше-влак кокла гыч 79,1% калык йӱклен лийын.

– Тиде кечылаште шке гражданский порысыштым 765 еҥ шуктен, – каласыш мыланна УИК вуйлатыше Наталья Красноперова. Краснохолмский селасе 2219 №-ан участкыште 1358 еҥым регистрироватлыме. Тыште Конституцийыш вашталтыш-влакым пуртымо шотышто чылаже тӱжем утла еҥ йӱклымаште участвоватлен.

Участковый сайлымаш комиссийын членже-влакын мутышт почеш, чыла штатный режим почеш эртен. Еҥ-влак «Нефтяник» ДК-те йӱклаш тӱҥ омса гыч пурат да вес омса гыч, икте-весышт дене тӱкныде, лектыт. – Шукыжо 1 июль деч ончыч йӱклен, – каласышт мыланна 2216 №-ан участковый сайлымаш комиссийыште (Шоръял).

Нунын данныйышт почеш, 491 еҥ гыч 1 июльлан 351 еҥ йӱклен лийын, тиде 71,4%.

Кузе УИК член Алевтина Тимиркаева палемдыш, тӱҥ шотышто илалше еҥ-влак шке гражданский порысыштым кумылын шуктеныт. Шукышт мӧҥгыштышт йӱкленыт. Участкыште тыгак фельдшер Динара Шамкаева дежуритлен.

Районан ик эн мӱндыр ялыштыже, Тошто Яшыште, йӱклымаш сайын эртен.

– Ожно гын сайлымашке илалшырак еҥ-влак марий тувырым чиен толыт ыле, – каласкалат 2210 №-ан сайлымаш комиссийын членже-влак. - Кандырам куштеныт. Тиде гана шукыжо пӧртыштышт йӱкленыт.

Мемнан миймына годым сайлымаш участкыш ачаж ден эргыже Владислав ден Александр Шавалиевмыт толыныт ыле. Тиде йӱдым нуно вахте гыч пӧртылыныт улмаш. Нуно чоҥышо организацийыште пашам ыштат.

– Тек вашталтыш-влак сай гына лийышт. Самырык-влаклан полшаш кӱлеш, яллаштат паша лийже. Тунам нигӧат шочмо ялжым кудалтен ок кай, – каласыш Александр.

2188 №-ан сайлымаш участкыште, тудо 2 №-ан Калтаса КШ-то верланен, чылаже 596 еҥым регистрироватлыме. Мемнан мийымына годым 35 еҥ йӱклен ыле. 25 июнь гыч тӱҥалын 1 июль марте чылаже 423 еҥ йӱклымаште участвоватлен.

– Калык толеш, – ойла УИК вуйлатыше Динара Хазиева. – Калык кумылын йӱклаш толеш.

Районысо чыла сайлымаш комиссийлаште волонтер-влак пашам ыштеныт. Нуно увер дене листовко-влакым шалатеныт.

Самырык еҥ-влак, кӧлан 18 ий темын да икымше гана йӱклаш толын, тиде кечым кужу жап шарнен илаш тӱҥалыт, докан. Нунын йӱклаш тыланымашышт уло. Район мучко икымше гана 253 еҥ йӱклен.

Районысо чыла сайлымаш комиссийлаште йӱклымаш чыла санитар нормым шуктен толмаш дене эртен. УИК-ыш пурымаште эн ончыч температурым висеныт да аралалтме средстве-влакым (маске ден перчаткым) пуэныт. Йӱклымӧ пӧлем-влакым кажне кок шагат жапыште мушкыныт, омса кыл-влакым антисептик дене ӱштынак шогеныт.

В. Акиев, О. Айгильдина, Э. Мурсакаева.