Мемнан календарьна

Кеҥеж рӱдӧ. Йӱр шуэнрак лиеда. Утларакше ояр игече шога. Вуй ӱмбалнысе канде каваште теве ик вере, я вес вере ош пыл чумырка-влак эркын ийын коштыт. Южгунам нуно иктыш ушнен кугемыт, але, мӧҥгешла, ялт шаланен пытат. Тыгай годым каваште шокшо кече гына озалана.

Шокшо кечыйол деч чодыра ӱмылыш шылше кайык-влак шыпланеныт – шӱмым вӱчкышє моктем мурышт огеш шергылт. Купласе ужава-влакат йӱкланымым чарненыт да тура кечывал жапыште вӱдысє лопшудо лышташ ӱмбалне шыпак нерен шинчат.

Чодыраштат йокрок огыл. Эше тушто тамлын-тамлын ӱпшалтше снегат пытен огыл, шем модоат, вӱр гай да шере эҥыжат кӱын шуын, поген налмым вучат.

Кеҥеж рӱдын тылзыже – июль – ялозанлыкын эр тургым паша тӱҥалтыш жапше.