Волонтер-влаклан таум каласеныт

Самырык-влакын кечышт вашеш районысо Культура пӧртыштӧ «Наша забота» волонтер штабын активистше-влак дене пайрем вашлиймаш эртен

Волонтер штабыш доброволец-волонтер, студент, районысо Молодежный советын активистше, учреждений ден верысе самоуправлений органын пашаеҥже, предприниматель да тыглай ура чонан еҥ-влак пуреныт.

Волонтер-влак герой лияш тыршен огытыл, нуно неле, пандемий жапыште еҥ-влаклан полшеныт. «Волонтеры без границ» награде лиеш ыле гын, мемнан чыла волонтерлан тудым пуаш лиеш ыле. Районысо волонтер-влак ятыр направлений почеш пашам ыштеныт. Илалше еҥ, икшыван еш, самоизоляцийыште шинчыше, тыгак неле илыш ситуацийыш логалше еҥ-влаклан полшеныт.

Нунын пашаштлан район администраций вуйлатыше Ю.М. Садыров тауштен:

– Волонтер-влакын еҥ-влаклан полышым ончыктымышт, нунын поро, чытыше, тыршыше улымышт нерген ойла, – каласыш Юрий Минзарипович. – Уло кумылын полышым ончыктымыланда тау тыланда! Те порылыкым ончыктымаште пример лийын кодыда. Тыланда пеҥгыде тазалыкым, чыла пашаштыда сеҥымашым гына тыланен кодам. Тек пашада эре куаным гына конден шогыжо.

Тыгак волонтер-влаклан поро мутым районысо самырык-влак дене пашам намийыше комитетын вуйлатышыже Э.Б. Мурсакаев, «Икоян Россий» политпартийын верысе пӧлкажын исполнительный секретарьже З.В. Максимова ойлышт.

Эн сай волонтер-влак наградым нальыч. Район администраций ден самырык-влак дене пашам намийыше комитетын тауштыме сарышыже да чап грамотыж дене 25 еҥым палемдыме.

Пайрем программым онлайн-концерт умбакыже шуен, тудым «Оставайся дома» проект почеш районысо самырык активист-влак ямдыленыт.

Э.Б. Мурсакаев, самырык-влак дене пашам намийыше комитетын вуйлатышыже:

– Поснак куг таум мемнан спонсорна-влаклан каласыме шуэш. Районышто волонтер штаб пашам ышташ гына тӱҥале, мыланнна эн ончыч Азат Галлямутдинович Габдрахманов, муниципаль район Советын вуйлатышыже, йыҥгыртыш да каласыш: «Мый тыланда полшынем». Тыге тудо мыланна полшен шоген.

Тыгак мыланна полышым предприниматель, район Советын депутатше-влак Ринат Хамзинович Хайдаров ден Павел Тимурович Петров, «Икоян Россий» политпартийын верысе пӧлкажын исполнительный секретарьже З.В. Максимова ончыктышт. Тау нунылан.

С. Аркадьева.