Калтаса ужара
+29 °С
Пылан
Все новости
Новости
8 Сӱрем 2020, 13:00

Краснохолмский селан ветеран-нефтяникше-влак «Башнефтьын» черетан юбилейжылан ямдылалтыт

Нунылан уло мо дене кугешнаш

«Башнефть» АНК республике дене пырля чапле датылан – башкир нефтьлан 90 ий теммылан – ямдылалтеш. 1932 ий 15 майыште Ишимбаево ял воктене 702 №-ан скважине гыч икымше гана промышленный нефтьым налыныт. Тиде событий республикыштына «шем шӧртьным» тулен налымылан тӱҥалтышым пыштен. Юбилей вашеш пайрем мероприятий-влак эрташ тӱҥалыт, ветеран-влак самырык еҥ-влак дене вашлийыт, башкир нефтяник-влакын историй поянлыкыштым аралыме шотышто комиссий пашам ышта.
Республикысе нефтяной промышленность вияҥмашке изи огыл надырым Краснохолмский селасе нефтяник-влакат пыштеныт. Кодший нуно республикысе йӱдве-касвел территорийыште нефтьым тулаш тӱҥалмылан 70 ий теммым палемденыт.
1949 ий 20 октябрьыште мемнан районысо Кырпе ялыште «Башвостокнефтеразведка» трестын черетан нефтеразведкыже лийын да тудлан «Оръямучаш» лӱмым пуэныт. 1 №-ан разведке скважиным 1950 ийыште У Оръямучаш ял воктене 2196 метрыш буритлен. Тиде пашам буровой мастер Федор Иванович Головицинын бригадыже шуктен. А промышленный нефтьым Оръямучаш месторожденийыште лач кум ий эртымеке веле тулаш тӱҥалыныт. Тиде пашам буровой мастер Николай Георгиевич Андреевын бригадыже шуктен.
Разведке буренийын шочмыжлан 70 ий темме вашеш Краснохолмский селасе ветеран-нефтяник-влак «Калтасинская нефть» книгам луктыныт. Тыште мемнан кундемыште нефть отрасль вияҥме нерген материалым, ветеран-влакын шарнымашыштым муаш лиеш.
Тиде ий Краснохолмский селасе нефтяник-влаклан башкир нефтьын юбилейжылан ямдылалтме, селаште буровик-нефтяник-влаклан памятник-мемориалым шогалтыме шотышто келыштарымаш ий лийын. Мемнан кундемыште «шем шӧртьным» кычалше-влакым шарнен илаш тиде памятникым шогалтыме лиеш. Тидлан кӧра ветеран-влак регионышто тиде отрасль вияҥаш тӱҥалме верлаште лийыт, тидыже эн ончычак скважине-влак, кушеч икымше гана промышленный нефтьым тулен налаш тӱҥалыныт. Тиде кечылаште Краснохолмский УБР-ын ветеранже-влак Сергей Иванович Александров, Василий Ильич Порошин да Сергей Петрович Марутин 26 №-ан скважиныште, тудо Оръямучаш площадьыште верланен, лийыныт. Лач тыште промышленный нефтьым тулаш тӱҥалыныт. Тиде скважине мемнан да Янаул район границыште, Тошто Оръямучаш ял шеҥгелне верланен.
Сергей Иванович Александров тиде скважиным буритлен огыл, но шке паша корныжым лач буровой мастер Николай Георгиевич Андреевын бригадыштыже тӱҥалын.
1961 ийыште Грозный оласе нефтяной институтым тунем лекмеке, тудым направлений почеш мемнан республикышке, Калтаса районышко колтеныт. Калтасасе бурений конторым тунам Евгений Васильевич Столяров вуйлатен, вара тудо ятыр ий «Башнефть» НПО-м вуйлатен. Ончыч бурильщикын полышкалышыже лийын ыштен, вара буровой мастер. Ик жап гыч инженер пашашке куснен. 1970 гыч 2008 ийла марте Сергей Иванович Краснохолмский УБР-ын тӱҥ технологшо. Районышто нефтяной отрасль вияҥмашке тудо изи огыл надырым пыштен. Скважине-влакым тӱзатымаште у технолгий-влакым кучылтын, чолга рационализатор лийын.
Василий Иванович Порошин тыгак Краснохолмский УБР-те 1961 ийыште подсобный пашазе семын тыршаш тӱҥалын. Октябрьский оласе нефтяной техникумым тунем лекмеке, тӱрлӧ пашам шуктен – профушем комитет вуйлатыше, УБР вуйлатышын производство шотышто алмаштышыже.
Тудо илыме вер ден вышке-влакым чоҥымылан вуйын шоген. Кужу жап нефть промышленностьышто пашам тыршен ыштымыжлан Василий Ильичлан «Заслуженный строитель Республики Башкортостан» лӱмым пуымо.
РФ-се нефтяной промышленностьын сулло пашаеҥже Сергей Петрович Марутин коло вич ий, 1985 ий гыч тӱҥалын 2010 ий марте, буровой бригадым вуйлатен. Свердлов оласе горный институтым тунем лектын. Марутинын бригадыже Краснохолмский, вара пырля ушымеке Нефтекамск УБР-тат эн сайлан шотлалтын. Лач тудын бригадыжым Оренбургысо нефть улман вер-влакым почаш колтеныт.
– Оренбург областьыште мый бригадем дене куд ий пашам ыштышым, –шарнен ойла Сергей Петрович. – Тушто мланде йымалсе горизонт йӧршеш вес тӱрлӧ, скважиным вес семын буритлаш логалын. Туге гынат, ме пашанам шуктенна. Лач тушто, Оренбург областьыште, мый, Калтаса районемын моторлыкшым аклаш тунемым.
Ю. Шамсутдинов.