Калтаса районышто шуко пачеран пӧртлаште подъезд-влакым олмыктымо шотышто паша умбакыже кая

Район калыкым ик кечыште подъезд кок гана вашлиеш: кунам нуно пашашке каят да кунам паша гыч пӧртылыт. Подъездын тӱсӧ кумылым волтенат, нӧлталынат кертеш.

Кузе мыланна район администрацийын илыме-коммуналь озанлык секторышто увертарышт, тений республике программе почеш латвич подъездым олмыктышаш улыт. Тачысе кечылан кушто дыр паша мучашке лишемеш, кушто дыр паша шолеш, а кушто дыр тӱҥалынат огытыл. Краснохолмский селасе Горький уремысе 11 а пӧртыштӧ инженер сетьым олмыктымо паша мия: канализаций, водоотведений, теплоснабжений. Тиддеч вара гына подъезд-влакым олмыкташ тӱҥалыт. Тиде пӧртыштӧ гын кок подъезд.

– Таче ме Фрунзе, 17 ден Губкина,1 уремласе подъезд-влакым олмыктена, – ойла «Алга» ООО подряд организацийын вуйлатышыже Радик Хабибов. – Калтаса селаште Карл Маркс 103 ден Краснохолмский селасе Столяров урем, 10 подъездлаште чыла паша мучашке лишемын манаш лиеш.

Мут толмашеш каласен кодаш кӱлеш, Радик Хабибов дене ме икымше гана гына огына вашлий. Кодший тудын подряд организацийыже мемнан районышто 28 подъездым олмыктен.

Капитальный олмыктымо пашам шуктымо годым тыгай паша-влак шукталтыт: кӱлеш гын, тӧрза, омса-влакым вашталтыт, пырдыж-влакым чиялтат, электромонтажный паша-влакым шуктат, почто яшлык-влакым вашталтат. Чыла пашалан оксам республике ойырен, ужашыже район бюджет гыч. Калтаса районышто тений кандаш пӧрт подъездым олмыкташ шонат.

– Олмыктымо паша мыланна келшыш, – каласкала Калтаса селасе Карл Маркс уремысе 103 пӧртын старшийже Нина Нурисламова. ­– Чиялтеныт, чыла вашталтеныт. Тышке пурет да чон куана.

Кугу эстетический проблемылан электрокоммуникаций шотлатеш. Шинчалан вигак кечыше электровоштыр перна. Нуно тӧр пырдыж ден мотор чиян тӱсшым пытарат. Конешне, пашазе-влак тиде ситыдымашым кораҥдаш тыршат. Электрический линий-влакым кабель-каналыш чыкат, выключатель, светильник-влакым энергосберегающийлан вашталтат.

Икманаш, подъезд-влакым олмыктымо паша шолеш веле. Нуным жапыштыже да сай качестве дене ыштат манын, ӱшаныме шуэш.

О. Айгильдина.