Кургым ямдылыме тургым жапыште Калтаса районысо озанлык-влак икте-весыштлан полшат

Районышто кургым ямдылме камапний мучашке лишемеш. Шукияш шудын 85 процентшым солымо, озанлык-влак шуко шудо ден сенажым ямдыленыт. Тыгодым шукышт икте-весыштлан полшат, то технике дене, то моло дене.

– Поснак икте-весыштлан кресаньык-фермер озанлык-влак полшат, – ойла ИКЦ-ын агроном-консультантше Борит Мухтаров. – Кӱлшӧ чыла ялозанлык техникым налын шукташ ок лий. Мутлан, силосым погышо комбайн-влак кызыт икмыняр миллион теҥге шогат, а тудым идалыкыште улыжат ик тылзе кучылтат. А изирак озанлыклаште ик арня веле кучылтыт. Сандене кресаньык-фермер озанлык-влак полышым пошкудышт деч, кӧн тыгай технике уло, йодыт. Сенажым погымо КСК-100 «Заря» ялозанлык кооперативыште да Василий Зайникаевын кресаньык-фермер озанлыкыштыже уло. Кызыт тиде агрегат ужар массым сола да тыгыдемда. «Заря» СХПК гыч Артем Ильбарисов Захаров, Путилов, Алиевын кресаньык-фермер озанлык-влаклан да «Новый путь» ялозанлык кооперативлан полшен. Савакмарий гыч Владимир Иргибаев Хасанов кресаньык-фермер озанлык, Ленин лӱмеш ялозанлык кооператив да моло озанлыклаште сенажым погаш полша.

Тиде кечылаште ме Калмаш ялыште Казанчеевын озанлыкыштыже лийна. Игече пеш шокшо ыле гынат, паша чарнен шогалын огыл – озанлыкыште сенажым оптеныт. Пасушто КСК-100 дене Владимир Иргибаев шудым солен. Ужар массым пасу гыч «КамАЗ» ден «ГАЗ-56» дене озанлык вуйлатыше Михаил Казанчеев ден Юрий Шуматбаев шупшыктеныт. Сенажым Т-150 трактор дене Вячеслав Шуматбаев тошкен.

– Озанлыкыште чылаже 120 шолдыра тӱкан вольык, – каласкала Михаил Казанчеев. – Телылан кургым шуко ямдылаш кӱлеш. Шудыжым шке поген кертына, а теве, сенажым погаш Савакмарий ял гыч кресаньык-фермер озанлык вуйлатыше Василий Зайникаев полша. Тачысе кечылан шудым 600 рулоным ямдылыме, туге гынат тиде мучаш огыл, кызыт МТЗ-80 трактор дене рулон дене шудым Руслан Бастаев пӱтыра. Шудым Геннадий Быков сола. Кок-кум кечыште сенажым оптен налына гын, вольыкым телым пукшен лукташ курго сита да эше ужалашат кодеш.

Ю. Шамсутдинов.