Палаш уто огыл

Мӱкш пӱшкылмылан кӧра айдеме коленат кертеш, сандене тидым айда-лийжылан шотлыман огыл. Пӱшкылмеке, писынрак умдыжым кораҥдаш трышыман. Уке гын, умдо келгышкырак пура да ярым утларак колта. Тыгодым тудым лаштыртыме деч шекланыман, тыге аяр организмыш чотрак логал кертеш.

Пӱшкылмӧ верыш ийым але холодильник гыч йӱштӧ настам писынрак пышташ кӱлеш. Мӱкш тӱрвым але йылмым пӱшкылын гын, тиде поснак лӱдмашан. Вигак ийым шупшман але пеш йӱштӧ вӱдым йӱман. Вуйышко, шӱйышкӧ пӱшкылмат сай огыл. Тиде верым нафтизин, нашатырь спирт але нимо уке годым кочмо содо вӱд дене йыгаш кӱлеш.

Аллергий ынже лий манын, кеч-могай антигистамин препаратым – супрастиным, диазолиным да молымат – йӱман.

Пӱшкылшӧ насекомый-влак черым тарватыше бактерийымат шарен кертыт, сандене тиде верым шовын, маргонцовко вӱд дене мушкаш але спиртым йыгаш уто огыл.

Пачемыш пӱшкылмӧ годым мом ыштыман?

Корштымым чараш спиртан компресс полша.

Нӱжымӧ пареҥгым ӱмбакше пыштыман.

Пӱшкылмӧ верым свежа чеснок дене йыгыман.

Пачемыш, мӱкш шӱйым пӱшкылыныт гын, чот пуал кертеш. Тидыже кугу лӱдыкшым луктеш, сандене медучрежденийыш полышым йодын кайыман.