Оралте-влак калыклан служитлышаш улыт

Мемнан районышто оралте территорий-влакым тӱзатыме шотышто паша кок объектыште намиялтеш

Кодший гыч республикыште илыме озанлык шотышто кок программе пашам ышташ тӱҥалын. Нунылан кӧра шуко пачеран пӧртлан чумыр пӧрт инфраструктурыштым саемдаш тӱҥалыт. Икымше – подъезд-влакым капитально олмыктат, кокымшо программе почеш оралте территорий-влакым тӱзаташ тӱҥалыт.

Кок программыжат шуко пачеран пӧртлаште илыше калыклан шке пачерыштышт гына огыл сай, тыгак подъезд, оралтыштат кумылло лийже манын ышталтеш.

Мемнан районышто тыгак тиде программе-влак дене паша-влак намиялтыт. «Башкирские дворики» программе почеш кок объектым ыштышаш улыт. Паша-влак Калтаса селасе Карл Маркс уремысе 101, 103 да 105 пӧртласе оралтылаште да Краснохолмский селасе Губкин, Герцен да Октябрьская уремласе оралтылаште намиялтыт.

– Оралте-влакым тӱзатымаш эн ончыч асфальтым пыштымаш гыч тӱҥалеш, вара бордюр ышталеш, парковко вер, вара гына йоча модыш площадке резине покрытий дене ышталтеш, - каласкала район администрацийын ЖКХ да чоҥымо паша шотышто пӧлкан специалистше Ляйсан Гильмишарипова. – Тиддеч посна изи архитектур формо-влаклан – шӱкшак урнылан, теҥгыллан да увер стенд-влаклан изи огыл тӱткыш ойыралтеш. Мемнан объектлаште тиде гана Нефтекамск ола гыч «Танып» ООО ышта. Нунын тӱҥ паша профильышт – корным чоыҥмаш. Сандене тиде предприятий шке пашажым сай качестве дене да срокыштыжо шукта манын, ме ӱшанен кодына. Кызыт нунын ыштыме пашашт мыланна келша.

Лач подрядчик деч паша лектыш шога. Кодшийсе подрядчикым налаш гын, нуно кызыт мартеат шке пашаштым ыштен шуктен, сдаватлен огытыл. Подрядчик неле финанс ситуацийыш логалын да пашажым жапыште ыштен шуктен огыл. Но район администраций нине объектлаште паша мучашке лишемже манын чыла ышта.

Ю. Шамсутдинов.