Тамакым шупшат - закон почеш мутым кучаш тӱҥалат

Башкирийыште парк ден остановкылаште тамакым шупшаман огыл.

Башкирийыште илыше калыклан закон почеш, парк ден остановкылаште тамакым шупшаш чарыме. Тиде закон вийыш пурен, тудым пудыртет гын, 500 теҥге штрафым тӱлаш тӱҥалат, уэш логалат – 1000 теҥге.

«Федераль законодательство регион-влаклан кушто шупшаш чарыме, ешартыш вер-влакым ышташ кӱшта. Шуко регион тиде права дене пайдалана. Меат тиде пример почеш кайышна да кышкар-влакым (ограничения) шындышна», – умылтарыш Кугыжаныш Погын – Курултайын вуйлатышыже Константин Толкачев.

Остановко, парк, сквер деч посна, тачысе кече гыч республикыште подземный ден надземный переходлаште, каныме, туризм, физкультура да спорт дене заниматлалтме, культурно-массовый мероприятий-влакым эртарыме верлаште тамакым шупшаш ок лий.