Кӧтерем села гыч вате-марий Дорофеевмыт икте-весыштым пагален куан дене илат

Шӧртньӧ сӱан – пел курым пиалан, еш кылым аралыме жап. Чыланат мый денем келшеда дыр, ты юбилей марте чыла огыл еш мужыр илен шуэш. Вет тиде чапле юбилей веле огыл, тыгак еш кылыште у тошкалтыш.

Кӧтерем селаште илыше Надежда Наумовна ден Леонид Дорофеевмыт лач тыгай пиалан мужыр улыт. Ты пиалан дате дене нуным Келтей ялсовет администраций вуйлатышын пашажым шуктен толшо Ульяна Батыршина саламлаш толын. Тудо юбиляр-влаклан Саламлымаш адресым да республике вуйлатыше деч шарнымаш пӧлекым кучыктен.

Дорофеевмытын еш историйышт эше Уфа олаштак тӱҥалын. Республикын рӱдолаштыже Бирск район гыч Леонид да Караидель район гыч Надежда вашлиялтыныт. Надежда Наумовна 20 №-ан училищыште тунемын да шыл комбинатыште пашам ыштен. Леонид Иванович Уфасе макарон фабрикыште тракторист лийын тыршен. Самырык еҥ-влак тӱшкагудышто вашлиялтыныт. Ты вашлиймаш пеҥгыде кылыш савырнен, мучаште сӱаным модыныт. Самырык еш ик жап Уфа олаште илен: Надежда Наумовнан изажын палымыже-влак Калтаса районыш нефтяникмыт поселкыш илаш куснаш каҥашым пуэныт. Теве 48 ий Дорофеевмыт еш Кӧтерем селаште ила. Пырля сулен налме канышыш лекме марте ик организацийыште – АРНУ-што пашам ыштеныт: Леонид Иванович – слесарь, Надежда Наумовна – оператор. Пашам тыршен ыштымыштлан нуным Таум каласыман серыш, Леонид Ивановичым «Почетан нефтяник» лӱм дене палемденыт.

Вате-марий эрге ден ӱдырым шочыктеныт да йол ӱмбаке шогалтеныт, кум уныкашт куандара.

Пелкурым эртымекат, Леонид Иванович ден Надежда Наумовна икте-весыштым пагален, переген, эҥертен, полшен илат.

Еш пырля келшен, каҥашен пашам ыштышаш, икшывым куштышаш, проблеме-влакым каҥашышаш, куан дене пайлалтшаш. «Келшен, тыныс, икте-весым пагален да аклен илыман, тунам чыла лиеш», – ойлат Дорофеевмыт.

С. Аркадьева.