Калтаса районышто коронавирус дене 35 еҥ черланен

Район территорийыште коронавирус инфекций дене черланыше-влак улыт. Районысо рӱдӧ эмлымверын официальный данныйже почеш, 27 июньлан 35 еҥ черлылан шотлалтеш.

– Коронавирус поснак илалше еҥ-влалан лӱдыкшӧ. Районышто ситуаций неле, черле-влак шукемыт, сандене районышто илыше калык деке ик йодмаш – чыла мерым шотыш налза. Кевытыште, калык шуко погынымо верлаште маске ден перчаткым чийыза. Киддам шовын дене мушса але дезинфекций средствым кучылтса, – каласыш мыланна Калтаса рӱдӧ эмлымверын тӱҥ врачшын алмаштышыже Ильшат Ильдарович Фаткуллин.

БР здравоохранений министр Максим Забелин правительствыште оперативный каҥашымаште коронавирус шотышто актуальный данный-влакым каласен: «27 июль 9:00 шагатлан коронавирус дене черланыше 6607 случайым палемдыме. Суткалан 36 еҥ черланен. Процент дене ойлаш гын, 0,5%. Амбулаторно 1536 еҥ эмлалтеш. Стационарыште – 204, тушеч 35-ше неле состоянийыште.

Суткаште коронавирус инфекцийлан 5326 анализым налме. Чылаже тиде жапыште 54100 текшырымашым ыштыме».

Э. Мурсакаева.