«Восход» СХК-те кургым ситышын ямдленыт

«Восход» СХК-те тӱжем утла шолдыра тӱкан вольык уло. Тыште лӱштымӧ ушкалат, ӱшкыжат, презе-влакат улыт. Озанлыкыште вольыкым огыт кӱтӧ, идалык мучко отарыште гына пукшен шогыктат. Сандене кургым моткоч шуко ямдылаш кӱлеш. Кузерак озанлыкыште тиде пашам шуктат, мыланна агроном Егор Зайнетдинов каласкалыш.

– Кургым шуко ямдылашлан, шукияш шудо шуко да кӱкшӧ лийшаш, – ойла Егор Камитдинович. – Шукияш шудыланат, пырчан культура-влак семынак, ме кугу тӱткышым ойырена. Кажне ийын у пасушто шудым ӱдена, ӱяҥдышым шавена. Тений 105 гектарыште люцерным да 40 гектарыште козлятникым ӱденна. Чылаже шукияш шудым ме 740 гектарыште ӱденна. Шудо ден сенажым ситышын ямдылашлан тиде площадь мыланна але сита. Шудо мемнан эре сайын кушкеш да сай лектышым пуа. Вич-куд ий ме ик пасушто шудым солена, вара куралына да пырчан культурым ӱдена.

Шудымат, сенажымат ме шапаш дене ямдылена. Сенажым оптымаште кургым погышо «Полесье» комбайн дене Александр Шуматбаев тыршен, ужар массым фермышке «Вольво» автомашина-влак дене Алексей Ильчибаев ден Игорь Баймурзин, «КамАЗ» дене Сергей Камалов шупшыктеныт. Шудым вес бригаде ямдылен. «Кейс» самоходный косилке дене Николай Исашев солен, вара кошкышо шудым МТЗ-82 трактор дене Виталий Кудайметов ден Александр Шуматбаев рулонлашке чумыреныт. Пасу гыч рулон-влакым Руслан Ильбарисов ден Валерий Пайдемиров шупшыктеныт. Шудым ме кӱчык жапыште ямдылена, сенажым гын оптен пытаренна. Механизатор ден водитель-влак йӱджӧ-кечыже тыршеныт манаш лиеш. Игечыжат кургым ямдылыме жапыште чыла шотыштат йӧнан лийын.

Кургым ямдылымаш эше пашан пелыже гына, шудо да сенаж дене гына вольык ок тем. Нунылан фураж кӱлеш. Пырчан культурат тений начар огыл кушкын, сай лектышым налаш шонена. Шукерте огыл гына чер да копшаҥге-влак деч химпрополкым эртарышна. «Туман – 2» опрыскиватель дене смене дене Александр Шуматбаев ден Сергей Байдимиров тыршеныт, а нунылан вӱдым «КамАЗ» дене Сергей Камалов шупшыктен.

Вольыкым пукшымо шотышто кургым ситышын ямдылена. Нуно чыла шотыштат тутло да пайдале кургым кочкыт. Сандене шӧр лектышат кӱкшӧ. Кажне ушкал деч доярке-влак идалыкыште 5 тӱжем килограмм дене шӧрым лӱштен налыт.

Ю. Шамсутдинов