Кумалтыш угыч ялышке пӧртылеш

Эртыше каныш кечылаште Васола ял отышто кумалмаш эртен. Тышке погынышо еҥ-влак шке ешыштлан, яллан, тыгак тӱняште сай, тыныс илышым йодын кумалыныт.

Кумалмаште верысе калык веле огыл, тыгак Москва, Нижний Новгород ола, Ханты-Мансийский округ, Краснокамский район, Калтаса да Краснохолмский села, Павасола ял гыч уна-влак лийыныт. Нуно чыланат эрвел марий-влакын кугурак картше Геннадий Пастиевын да Краснокам районысо Пураял гыч тудын полышкалышыже-влак Виталий Искаков ден Вячеслав Афкаликовын вуйлатымышт почеш Юмо деч йодын кумалыныт.

– Совет жапыште марий яллаште кумалме йӱлам йомдарыме лийын, – ойла Радислав Зайнашевич. – Таче гыч тудо изи ошкыл дене угыч пӧртылеш. Эртыше ийын ме икымше гана кумалаш лектынна. Тылеч ончыч, кудло ий утла мемнан отышто кумалтыш эртаралтын огыл. Иктыже куандара, марий калык шке йӱлажым шарна да пагала. Теве Павасолаштат эрлашыжым ты йӱлам эртареныт.

Эше тидым палемдаш кӱлеш, марий калык пӱртӱс лоҥгаште кумалеш. Тагам надырлан кумалын пуат. Кажныже, кӧ кумалаш толын, пеленже сийым конда. Йӱла почеш, тудо кодымо сийым Юмылан ямдылыме атыш пышта. А нунышт индеше лийын.

Васола ялыште ото поснак ойыртемалтше верлан шотлалтеш. Ялын старостаже Радислав Зайнетдиновын мутшо почеш, кумалме верын шке правилыже-влак улыт. Тыште шӱклаш, уто мутым ойлаш, кугу йӱк дене кутыраш, тамакым шупшаш, пушеҥгым руаш, укшым тодышташ, пушеҥгышке сакалыме шовычым тӱкалаш, транспорт дене пураш ок йӧро. Тыгак шагат умдо коштмо велкылан гына коштман.

Изи ялышкат марий йӱлан пӧртылмыжо куандара. Ме вес калык коклаште илена гынат, шочмо йӱлам кучен, шочмо йылме дене мутланен да кугезе сугыньым шуктен илаш тыршена.

О. Айгильдина.