Районышто «Лӱдыкшыдымӧ каникул» проект почеш профилактике рейд-влак эртат

Республикыште икмыняр ий «комендантский шагат» пашам ышта. 17 ийым темыдыме ийготыш шудымо икшыве-влак кеҥеж жапыште 24 шагат гыч 6 эр марте кугыеҥ-влак деч посна шкет коштшаш огытыл. Тиде законодательный нормын кузе текшыралтмыже нерген йӱд рейд-влак ончыктат. Кугарнян, 24 июльышто, мый ик тыгай рейдыште участвоватлышым.

23.00 шагат. Мемнан изирак группына – Россий МВД-ын Калтаса районышто пӧлкажын ийготыш шудымо икшыве-влак дене пашам намийыме инспектор Наиля Камаева, культура пашаеҥ, ийготыш шудымо икшыве-влак дене пашам намийыме шотышто район комиссийыш пурышо Светлана Осипова да мый корныш тарванышна.

Мемнан маршрутнан икымше ялже – Калегин ял ыле. Фарын тулжо ялысе урем ден переулко-влакым волгалтара, Калегин ялыште тып-тымык, иктат ок кой. Самырык-влак погынымо верлам текшырен лектын нигӧм ышна уж, ме умбакыже тарванышна.

План почеш Амчемучаш ял. Южик пӧртлаште тӧрзаште тул коеш, ял эр малаш возеш. Уремыштат иктат ок кой, ни кугыеҥым, ик икшыве-влакым ышна вашлий. «Комендантский шагат» пашам ышта, – шоналтышым мый. Но тыге эре лийын огыл.

Кӧтерем поселкат мемнан йӱдымсӧ тымык да пустаҥше урем дене вашлие. А теве мӱндырнӧ йоча-влак тӱшка койылалдыш. Нунын деке тарванышна. ГДН инспекторын йодыштмыжлан йоча-влак вашештышт, мӧҥгӧ каена манын каласышт. Нунын коклаште ик ӱдырын кугырак акаже ыле. Ийготыш шудымо икшывын законный представительже огыл гынат, нунын коклаште кеч кугурак еҥ уло. Полицийын пашаеҥже Наиля Камаева «комендантский шагатым» текшырыме нерген ушештарыш да тудым пудыртымылан ача ден ава мутым кучаш тӱҥалыт манын палемдыш. Кӧтеремысе урем дене эше ик гана коштын савырнымеке, ме Келтей велыш тарванышна. Тыште мемнан группыш полиций патруль – общественный порядкым аралыме шотышто полицийын вуйлатышыже Л.А. Нурмухаметов да ….. ушнышт. Нунат рейдыш лектыныт.

Пелйӱд, пычкемыш, уремыште кеҥежымсе гай огыл яндар, вӱдыжгӧ юж. Ты жапыште пийымат уремыш колташ огыт лек. А теве икшыве-влак коштыт.

Мӱндырчынак ме самырык-влакын чумырген шогымыштым ужна. Кӱвар воктене лу еҥ шога. Эше икмынырыже нунын деке ошкылыт ыле. Пычкемыш, фарын тулжым ужыч, кугыеҥ-влак коклаште пешыжак айык огыл рвезе-влак дене пырля икмыняр ӱдыр ыльыч, тӱсыштым ончалын 12-13 ияш гай койыт. Пычкемыш йӱд дене пайдаланен, нуно шылаш тыршышт, но миен ыш лек.

Полиций пашаеҥ-влак ӱдыр-шамычлан машина деке толаш темлышт, тыште нунын дене мутланымаш эртаралте. Пален налме, чыланат ийготыш шудымо улыт. Нуно икымше гана веле огыл ты жапыште гуляен коштыт. Ача ден ава икшыве-влакын кушто коштмыштым огытат пале. Мутланымаш да административный протоколым возымо деч вара нуным мӧҥгышкышт намиен кодымо.

Ийготыш шудымо икшыве-влак дене мутланыме жапыште ты тӱшка гыч ик кугыеҥ шке праваж нерген ойлаш тӱҥале. Участковый уполномоченный «чын верч кучедалше еҥым» лыпландарыш. Тудланат КоАП-ын 20.21 статьяж почеш, административный протоколым возымо – общественный верыште йӱшӧ вуя лиймаш.

Ийготыш шудымо чыла икшывым тыгай рейдлаште контролироватлаш ок лий.

Ача-ава-влакын полшымышт деч посна профилактика системе ведомствын специалистше-влак йӱдым коштмыштым пытарен огыт керт. А ача-ава, икшыве-влак иктым умылышаш улыт, «комендантский шагат» икшывым туткар деч утарен кодаш манын ышталтын.